No.6611/2020-2021

Dated Champhai, the 20^th November, 2020: Vawiin chawhma  khan Champhai District Level Wildlife Crime Control Sub-Unit chu Chairman Pu Rex Zarzoliana Vanchhawng, SP Champhai hovin a Pisa-ah an thukhawm. 

Pu Rex Zarzoliana Vanchhawng chuan Champhai District chu International border-a awm a nih avangin Wildlife  Crime ven kawngah tanlak angaih zual bik thu a sawi a. Nungchate chu ralkhat  atanga ven mai duh tawk lovin a taka ngeia chechhuaka venhim angaih thu sawiin, kan zavaia kan intawiawm tlan a ngai hle dawn a ni, a ti. Naupangte atanga nungcha hunhallh inzirtir angaih thu pawh sawiin, nungchate inthlahpun  hun thlen hma ngeia chetlak vat a tul thu a sawi bawk. 

Pu Lalduhthlana, DFO &  Member Secretary, District Level Wildlife Crime Control Sub-Unit chuan meeting  hmasa  thurel tlangpui leh bawhzui anih dante a sawizau a. Thurel bawhzuiin  Police leh Forest department tangkawpin Joint   Patrolling an neih thin a ni, a ti.   Wildlife Crime kaltlangin Case 4 ziahluh anih thu tarlangin, 1 chu thiamloh chantir tawh a ni a, a dang 3 te erawh ngaihtuah mek a nih thu a sawi a. Wildlife Crime a thlen tuma thuneitute hriattir thinte hnenah lawmman siam sak thin anih thu pawh sawiin, lawmman 1 pek chhuah tawh niin 1 dang pawh buaipui mek  a ni, a ti bawk.  DFO chuan Wildlife Protection Act leh Arms Act sawifiahin, silai kenga chhuakin ramsa leh savate kap kher lo mahse kah tumna nei anga ngaih anih chuan dan tlawhchhana man theih anih thu a sawi a. Champhai district chu nungcha, thing leh mau chi hrang hrang   awmna anih thu leh a ram leilung hausakna vawnghim tura theihtawp chhuah a tul thu sawiin, mipuite thawhhopuiah a sawm bawk a ni. 

Thukhawm chuan Wildlife Crime thleng thinte a titu  mana hremna pek anih ngei theihna turin tha zawka thawhho nise a ti a. Nungcha humhalh pawimawhna mipui vantlang,  Chanchinbu, Cable TV leh Social media kaltlanga  inzirtirna neih ni se, Wildlife Crime awmte thuneitu hnena hrilh zung zunga  puanzar thin nise tih a ni bawk. License neilo silai hmang leh license nei mahse anihna tur anga hmang lote a  theih chen chena dapchhuaha man zel nise tih a ni a, Wildlife Crime thleng thinte veng tur  Joint Patrolling thla khatah vawi 1 aia tlemlo neih thin nise tih ni bawkin, Police Station OC theuhte leh RO te’n ruahmanna siam se, ramri paltlang Wildlife Crime a awmin  Custom-te nen intawiawm tawna hmalak thin nise ti a rel a ni bawk.  

Sawrkarin District Level Wildlife Crime Control Sub-Unit  Member tura a ruatte bakah Champhai district hmakhua ngaiin helama tuimi leh tha thawh hlawk thinte ruat belh tha tih a ni a, Fisheries department , District VC Association, Sub-Hqtrs. YMA Champhai, MJA Champhai District, leh Champhai Nature Conservancy (CNC) te chu ruat belh an ni.   Champhai District  thendarh a lo nih tak avangin Champhai District puala Honorary Wildlife Warden ruat  thar tula hriat a ni  a, ngun taka  ngaihtuah anih hnuah  Pu Lalhlupuia, Editor, Lenrual Daily Newspaper, AIR Correspondent Champhai ni bawk chu Honorary Wildlife Warden a tan lungrual taka pawm niin, rawtna hi State sawrkar pawmpui tura thlen nise tih a ni bawk.