1062/2022-2023
Champhai, the 27th June, 2022: Vawiin chawhnu dar 2 khan Champhai District Level Wildlife Crime Control Sub-Unit chu Chairman Pu Lalrinpuia Varte, SP Champhai hovin SP Office Chamber-ah hmalak tawh dan leh tul dangte relin an thukhawm.

Pu Lalrinpuia Varte chuan kalkhawmte lawmna thu sawiin, District Level Wildlife Crime Control Sub-Unit member-te chu lungrual taka thawkhoa infinchhuah tlanpuiah sawmin, mahni theihna zawn theuhah thahnemngai taka ngaihtuahna seng theuh turin a chah a ni.

Member Secretary Pu Lalduhthlana, DFO Champhai chuan District Level Wildlife Crime Control Sub-Unit din a nih dante a tarlang a. Nungchate chunga pawikhawihna thleng thinte a awm loh nana hmalakte, hetiang ti an awma dapchhuah leh chhuizuia dan anga hmalak bakah a tul angte bawhzui tura duan a nih thu a sawi a. Hmalak dan tlangpuite a tarlang bawk.

Thukhawmah hian tunhnaia dan lova ram dang atanga nungcha lakluh man leh report dawnte laka hmalak a nih dante ngaihthlak niin, hmalak tul nia hriatte zau taka sawiho a ni a. Ram dang atanga dan lova nungcha tawlhluh man a awmin a mawhphurtute dan anga na taka hrem an nih theih nan Custom dan mai bakah, hremna remchang dangte nena umzuia bawhzui thin nise tih a ni a. Dan lova ram dang atanga nungcha lakluh mante himna tur leh nungcha dangte tibuai lo thei zawnga enkawl lailawkna tur Rescue & Rehabilitation Centre siam a nih theih nan thuneitu sang zawka rawtna siama thlen tha tih a ni a. Mipuite hnenah zau zawka inzirtirna kalpui tha tih niin, danin a humhalh nungchate, kawl theih leh theih lohte, kawl thei tura dan hnuaia hmalak tulte bakah nungchate humhalh kawnga dan leh hrai awmte inzirtirna neih nise tih a ni a. Member-ten remchan dan angin endikna Joint Patrolling neih nise tih a ni bawk.