1061/2022-2023
Champhai, the 27th June, 2022: Ruihhlo hman sual leh tawlh ruk dona ni 'International Day Against Drug Abuse and Illicit Trafficking' pualin vawiin khan District Level Nasha Mukt Bharat Abhiyaan (NMBA) leh District Level Narco Coordination Centre (NCORD) Committee, tangkawpte bultumin Govt. Champhai College zirlaite tan College Multipurpose Hall-ah ruihhlo leh a kaihhnawih chungchang inzirtirna buatsaih a ni. Thupui atan 'Ruihhlo vanga hriselna leh nun tluchhe mek hmachhawn dan - Addressing drug challenges in health & humanitarian crises' tih chu hman niin, District Bawrhsap Pu James Lalrinchhana chuan he hun hi khuallian niin a hmanpui a, Govt. Champhai College Principal Pu P. Lalhmingliana chu khualzahawm a ni. Hemi hnu hian zirna in hrang hrangahte ruihhlo leh a kaihhnawih laka fihlim tura inzirtirna buatsaih a ni bawk.

Khuallian Pu James Lalrinchhana chuan ruihhlo ngaihnain khawvel pumpui a tih buai thu sawiin, mimal, khawtlang leh ram nun, sum leh pai leh himna thlenga a nghawng thu a sawi a. Nasha Mukt Bharat Abhiyaan-Drug Free India Campaign hnuaia hmalakna tura thlan District zinga tel Champhai District-ah ruihhlo hluar zel tur do kawngah lungrual taka tanho angaih thu sawiin, hemi kawngah hian thalai lehkha thiam rualte nena do hlan a tul a ni, a ti a. International Day Against Drug Abuse and Illicit Trafficking pualin Champhai District Police-te man ruihhlo cheng nuai 5,000 chuang halral a nih thu te, hmalakna tam tak zingah ruihhlo chungchang inzirtirna zirna in, district jail leh remchangahte kalpui chhoh zel a ni, a ti bawk.

Zirna chu ruihhlo leh a kaihhnawih dangte beihlet leh dona kawnga hmanraw pawimawh berte zinga mi a nih thu sawiin, nakin lawka ram kaihruaitu tur leh nghahfakte chu ruihhlo laka inthiar fihlim tur leh, tum bul mumal tak neia thil chikna chang hre turin a fuih a. Hmabak eng tak nei zirlaite chu zirlai a chuang chauh nilo an vela awmte ngun taka chika ngaihven fo tur leh thiamna engemawtal neih nana hman tum turin a chah a. Ngaihsan tur dik tak ngaihsanna chang hre tur leh ruihhloin a tihbuai hman loha hmasawnna tura ngaihtuahna seng tura fuihin, hlawhtling tura tumruhna, taimakna leh rinawmna in neih chuan ruihhloin in nunah hmun a chang hman ngai dawn lo a ni, a ti a. Ruihhlo leh a kaihhnawih hlawhtling taka do let thei tura tanrual a pawimawh takzet thu sawiin, kan zavaia kan tanrual chuan kan hneh thei dawn a ni, a ti bawk.

Khualzahawm Pu P. Lalhmingliana chuan ruihhlo leh a kaihhnawih tih chu nawmchen duh vang a nih thu leh, taksa rilru leh ngaihtuahnate nghawngin a tihthuanawmp thin thu a sawi a. Zuk leh hmuam leh ruihhlo khawih chuan hlawkna a neih loh thu leh a lo thlawna sum leh pai khawhralna mai a nih thu tarlangin, damdawi hman khawloh chu mi anglo leh chhawrtlak loha min siamtu a nih avangin tihchhin tawp loh tur a ni, a ti a. Ruihhlo do chu mimal mai nilo tangruala do tlan tul a nih thu pawh sawiin, thalai rualte chu ruihhlo leh zuk leh hmuam laka fihlim tum tur leh mi hrisel, ram leh hnam tana chhawr tlak nih tum turin a chah a ni.

Thusawitu dang Pu F. Lalrinmuana, President, Sub-Hqrs YMA (SYMA) Champhai chuan ruihhlo do beihpui thlak kalpui angai ta mai chu vanduaithlak a tih thu sawiin, sim a harsat thin avangin danglam duh vanga ruihhlo tihchhin tum lo turin kalkhawmte a chah a. Ruihhlo a inhnamhnawih lova zirna lama hlawhtlinna chang tura theihtawp chhuah turin zirlaite a fuih a ni.

He hun hi Pu R. Lalmalsawma, Working Chairman, Anti-Drug Cell, Govt. Champhai College chuan a kaihruai a. Pi PB Liansangpuii, Member Secretary, Nasha Mukt Bharat Abhiyaan, Champhai District chuan program neih chhan leh ruihhlo do kawnga hmalakna tlangpui a tarlang a. Ruihhlo do hmalakna hnuaia inzirtirna Slogan, Poetry leh Short Video Clip insiamsiak kaltlanga tithate hnenah Bawrhsapin lawmman a hlan bawk a. Pu James Vanlalhruaitluanga, MS&RB chuan lawmthu sawiin hun a khar a ni.

Program neih zawh hnu hian Drug Awareness Rally neih a ni a, College zirlaiten program hmanna Multipurpose Hall atanga College Main Gate thlengin ruihhlo leh a kaihhnawih laka fihlim tura inzirtirnan kawng an zawh a. Chawhnu dar 2 ah Champhai khawpui chhunga zirna in thlan chhuah 11; Vengsang H/S, Govt. G.M. H/S, Govt. Roseland School, Govt. Vengthlang M/S, PES Vengthlang, Govt. Champhai H/S, Govt. Venglai M/S, Govt R.Hranga H/S, Govt. Kanan M/S, Govt. Bethel M/S leh Bethel H/S ahte ruihhlo chungchang inzirtirna mithiamten an nei bawk a ni.

Nasha Mukh Bharat Abhiyaan-Drug Free India Campaign hnuaiah hian India rama District 272 ahte ruihhlo do hmalakna kalpui a ni a. Aizawl, Kolasib leh Champhai District-te chu Mizoram atanga he campaign kalpuina tura thlante an ni a, Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District nia a tarlan zulzuia thlante an ni.