No.1167/2020-2020

Covid-19 vanga ram pum huap inkharkhip (Lockdown) chu May ni 31, 2020 thleng pawhsei a ni a. Hemi chungchanga Government of Mizoram, DM&R Order No B.13021/101/2020-DMR/Pt-III Date 17th May 2020 chu District level ah pawh hman ve nghal tur a ni a. Champhai District Magistrate Pu Mark Lalthanliana chuan a chunga order in a sawi bakah hian Champhai District chhunga Lockdown kalpui dan hmasaa District inkhaihhruaina chu rin chhunzawm tur a nih thu leh heng bakah hian a hnuaia tarlante hi siam danglam anih thu hriattirna vawiin khan a chhuah.

A. Bazar/Dawr hawn dan tur chungchang:
1. Dawr hawn hun te, dawr hawng thei tur chin leh dawr nghah dan turte chu Inkhaihhruaina hmasa angin kalpui chhunzawm tur a ni ang a, a hnuai a point hi belh a ni.

2. Bazarpui khar chhunzawm tur a ni a, amaherawhchu a chhunga dawr siamte chu nikhat kar danah in hawn chhawk phalsak an ni. An in hawn ni tur hi an awmna veng VLTF ten ruahmanna an siam ang.

B. Motor tlan dan leh Bungraw unload chungchang:
1. Motor tlan ni bik siam a ni tawh lo a (Sunday tiam in), passenger pawh registration a seat capacity aia tam lo an phur thei ang. Hei hian commercial leh private a huam ang.
2. District chhung leh pawn lama zin duhte tan a hranpain Movement Permit lak a ngai tawh lo ang.
3. Zan dar 7 leh zing dar 4 inkar curfew chu la chhunzawm zel tur a ni.
4. Champhai pawn lam atanga bungraw rawn lut reng reng chu Champhai khawchhunga rawn thlen veleh a hma thei ang berin unload nghal tur a ni. Khankawn atangin bungraw phurtu ten a chah tute an rawn hriattir tur a ni a, bungraw chahtu te'n VLTF te hriattirin a hma thei ang ber in unload tur a ni.
5. State pawn lam atanga Bungraw rawn thiar luttu Driver leh Handyman te chu an bungraw unload zawh ve leh haw tir leh nghal tur a ni a, an bungraw unload chhung hian mi dang hnaih ah an awm tur a ni lo a, khawiah mah an chhuak vak tur a ni lo. State pawn atanga bungraw rawn thiar lut driver leh handyman te bul hnaia lo khawsa (Mutria leh Midang) kan awm a nih chuan quarantine tur an ni ang.

C. Sawrkar Office chungchang:
Sawkar Office hawn leh kal dan tur chungchang chu State Guidelines in a tarlan anga kalpui tur a ni.

D. Tiau kama Feh/Balu lak chungchang:
1. Tiau kam leh Myanmar border lama feh tur bik te tan a hnuaia mi ang hian kalpui tur a ni.
a)Feh turte chu VLTF te’n permit an siamsak tur a ni a, permit-ah chuan an hming, address leh an fehna hmun tur (lo an neihna hmun) leh an feh ni (date) ziah lan tur a ni.
b) Mahni area pawn lama feh turte chu an va fehna tur hmuna VLTF te hnenah an permit nen an in report tur a ni a, permit neite chu harsatna siamsak loh tur a ni.
c) Feh hun hi kal hun leh haw hun mumal takin VLTF ten siamsak tur a ni. Feh/Loa kalte hi an haw hunah VLTF te hnenah an in report tur a ni.
d. Nitina feh tur chi leh riak tur chi te chu permit ah thliar hran tur a ni.

2. Tiau kama Balu la duh an awm a nih chuan an Balu lak tumna area VLTF te’n Permit an pek chauhin lak theih a ni ang. Permit-ah hian motor number leh a kal turte hming leh address ziah lan tur a ni a, Motor pakhatah driver tiam lovin mi 3 bak kal phal a ni lo ang.

E. Foreign bungraw lak luh chungchang:
Foreign (Myanmar) atangin eng bungrua mah lak phal a nilo. Stock awmsa a awm a nih chuan Zokhawthar Police OC hriatpuina chauhin lak phal a ni ang.