415/2024-2025

Champhai, the 3rd May, 2024: Securitisation and Reconstruction of Financial Assets and Enforcement of Security Interest Act,2002 (SARFAESI Act, 2002) hmangin Mizoram Rural Bank (MRB), Champhai Branch hnuaia Loan la, rul tha duh lo mi 3 te in dinglai loan lak nana dahkhamte chu Champhai District Magistrate Pu James Lalrinchhana thupek angin vawiin khan chhuhsak an ni a, Mizoram Rural Bank, Champhai Branch kutah hlan nghal a ni.

Champhai District Magistrate Pu James Lalrinchhana chuan SARFAESI Act, 2002 hnuaiah Champhai khawpui chhunga loan rul tha lo mi 3 te laka dan kengkawh turin thupek nimin khan a tichhuak a. Dr. Manesia Khaimeichho, Sub-Divisional Magistrate, Champhai District kaihruaiin MRB hotute leh Police te'n SARFAESI Act, 2002 hnuaia Section 14 (14)(i) in thuneihna a pek tlawhchhanin loan lak nana dahkhamte chu loan rulh that loh (Non-Performing Assets) avangin lilam turin an chhuhsak ta a ni.

Vawiina SARFAESI Act, 2002 hmanga loan rul tha lo ram dahkham chhuhsakte hi Champhai khawpui huam chhunga Dinthar vengah 1, Bethel vengah 1 leh Zote ah 1 te a ni a. In dinglai chhuhsak tak 3 te hlutzawng belhkhawm hi a hniam thei ang bera chhutin Rs 92,39,329 /- vel bawr a ni a, loan rulh ngai la bang hi Rs 57,36,424/- a ni. Loan rulh ngai aiah hian an ram dahkham chhuhsakte hi bawhzui tul angte tihfel a nih hnuah lilam tura ruahman a ni ang.

SARFAESI Act, 2002 hmang hian District Magistrate, Champhai District thupek bawhzuiin April ni 5, 2024 khan Champhai khawpui chhunga in dinglai 5 te chu loan rulh that loh avangin chhuhsak an lo ni tawh a. Heng bakah hian nimin May ni 2, 2024 khan Champhai khawpui chhung veng hrang hranga ram/in hmun 6 te pawh chhuhsak an lo ni tawh bawk a ni.