414/2024-2025

Champhai, the 3rd May, 2024: Sawrkar laipui Ministry of Tourism hnuaia Swadesh Darshan 2.0, Champhai Destination Scheme kaltlanga Champhai District-a tourism chawilar dan tur chungchanga pawimawhte sawihona leh inrawnkhawmna hun chu vawiin chawhnu dar 2:00 khan District Bawrhsap Pu James Lalrinchhana kaihhruaiin DC Conference Hall-ah neih a ni.

District Bawrhsap Pu James Lalrinchhana chuan Swadesh Darshan 2.0 kaltlanga hmalakna chu Aizawl leh Champhai District-ahte kalpui a nih thu sawiin, he hmalakna hi nakin zel thlira khualhip kawnga tanlakna leh sum leh pai lakluh nana tangkai tak tur a ni, a ti a. Hlawhtling taka kalpui a nih theih nan a kaihhnawih hrang hrangte nena inrawnkhawmna neih a ni chu thil pawimawh hmasa a nih thu a sawi a. Champhai District chu inkalpawhna kawngpui tha takin a pawh bakah ramri depa awm a nihnate, sik leh sa nuam, hmun mawi leh pipu sulhnu awm tamna district anihnate chu tourism chawilar nana hmanraw pawimawh tak a nih thu a sawi a. Thing leh mau leh nungcha humhalh chu tourism chawilar kawnga pawimawh a nih tel thu sawiin, Swadesh Darshan 2.0 chuan khuarel mawina tichhe lova duat tak leh uluk taka enkawl chung zela khualhip kawnga hmalak chu a thil tum pawimawh tak a ni, a ti bawk.

Swadesh Darshan 2.0 hi Ministry of Tourism, Govt. of India hnuaia kalpui a ni a, hemi kalpui tur hian tourism master plan mumal tak siam chhoh mek zel niin kum 10 atana tourism hmasawn nana hmalakna tur pawimawhte duan chhuah tur a ni a. Tourism Master Plan, Champhai Destination, Swadesh Darshan 2.0 ah hian point 5 thlurbing tur awmin sustainabilty, media promotion, IT & digitalisation, skill & capacity building leh private investment-te a awm a. Line Department leh Ministry dangte nena thawhhona zau zawk siam pawh a huam tel bawk a ni.

He hunah hian stakeholder-te atangin tourism chawilar kawnga pawimawh leh tul ni a hriatte ngaihthlak niin, harsatna leh rawtna neihte inpawhtlang taka sawiho a ni a. Khualhip nana hmunhma pawimawh neihte, khualzin mite him nana pawimawh tak Tourist Police tihnun kawnga hmalak dante, tourism product siam theihte, hotel leh restaurant kalpui dante, Tour Operator leh Tourist Guide chherchhuahte, inbiakpawhna lama harsatna awm chinfel nana training buatsaihte, khawtual siam wine bakah ei leh in hmanga khualhip dan turte, faina vawnnun pawimawh dante, pipu sulhnu pawimawh tak takte tangkai zawka hman a nih theih dan turte bakah pawimawh dangte sawiho a ni bawk.

He hunah hian Line Department hotute, Swadesh Darshan 2.0 scheme kalpui tura zirchianna neitu company EGIS India Consulting Engineers Pvt. Ltd. hotute, VCP te, Hotelier Association, Restaurant Association, Champhai Nature Conservancy, Self Help Group leh tualchhung dehchhuah indigenous product siam chhuaktute an tel a ni.