1615/2023-2024

Champhai the 23rd August, 2023 – Kumin MLA Inthlanpui 2023 lo awm tura media kaihhnawihna thuneitu leh hmalatu tura ECI in a ruat ‘Champhai District Media Certification and Monitoring Committee (MCMC)’ chu vawiin khan an Chairman Champhai DC&DEO Pu James Lalrinchhana kaihhruaiin DC Conference Hall, Keifangtlang-ah a vawikhatna atan an thukhawm.

Meeting kaihruati Champhai DC Pu James Lalrinchhana chuan election kaihhnawiha candidate leh party ten media hrang hrang kaltlanga political advertisement an ti chhuah chungchangah Election Commission of India (ECI) chuan Dan leh inkaihhruaina mumal tak a neih thu sawiin, Champhai District MCMC chu hemi kengkawh tura Committee din anih thu a sawi a. MCMC chu Election kaihhnawih Committee peng hrang hrang, a bik takin Election Expenditure Monitoring (EEM) te nen hmalak tlan thin a tul tur thu a sawi a. Champhai District-ah inthlan dik leh felfai kan neih theihna turin MCMC chu Committee pawimawh berte zing ami anih thu sawiin member-te chu an mawhphurna chiang taka lo inzir theuh turih a ngenin a chah a ni.

Election Commission of India (ECI)-in inthlanpuiah candidate-te'n sum an hman theih zat bituk a ni a, an senso chhut nan thil hrang hrang lei leh hman man bituk thin niin, chanchinbu, Radio, TV, leh Social media (Instagram, Facebook, Youtube)-te kaltlanga advertisement rate pawh felfai taka duan lawk tur a ni a. Vawiin meeting hian Champhai District tana Advertisement rate te sawihovin rate an fix a ni.

Electronic media hrang hrang – Radio, TV, Social media te kaltlanga political advertisement ti chhuak duh te chuan MCMC ah phalna an dil lawk hmasak a ngai a. MCMC hian Model Code of Conduct leh election Dan dang bawhchhiatna a awm em tih te lo enfiah hmasa in, a pawm (Certify) phawt a ngai a. He Certification kalpui dan tur te pawh hi vawiin meeting-ah hian zirho a ni.

Vawiin meeting-ah hian Pu Benjamin Zalawma Ralte, Election Officer chuan MCMC chungchang powerpoint presentation a pe bawk a ni.