Vawiin chawhnu khan Champhai DC Conference Hall-ah District Monitoring Committee on Accessible Elections (DMCAE) chu  Chairman Dr. Naveen Aggarwal, District Election Officer hovin an thukhawm. 

DMCAE thukhawm chuan Lok Sabha Inthlan 2019 neih zawh takah Rualbanlo/ Vohbik ten harsatna awm lo a Vote an thlak thei chu lawmawm tiin, an chanvo leh dikna neih hmanga an aiawh tur rolreltu  an thlan theih nana theihtawp a hmalak zel nise tha a ti a. Meeting chuan Rualbanlo/Vohbikte vote thlak   hruaitu tur Lirthei leh tanpuina dangte ngaihtuah thintu BLO, MPF leh mitlawmngaite chungah lawmthu  a sawi a. Mizoram chu tlangram chhengchhe tak anih avang leh hmunhma te duh anga a rem tawk loh thin avangin Vohbikten Vote an thlak ngei theihna turin  sawrkar lam atanga puihbawmna leh tanpuina awm thei angte pawh a tul anga dap zel nise tha tih a ni a. Mitdel vote thlak theite chu Mitdel hawrawp hmang thiam vek thei tura training buatsaih saka,  rualbanlote tan zau zawka inzirtirna leh inhrilhhriatnate neih tha tih a ni bawk. 

Election Commission of India chuan Rualbanlo/Vohbikte Vote thlak hi a ngai pawimawh em em a, inthlan neih apiangin an tan hma a la thin a ni. Electoral Revision Year 2018 tarlan dan chuan Champhai District-ah PwD Voters 572 an awm a. 21-Lengteng A/C-ah mi 117, 22-Tuichang A/C-ah mi 73, 23-Champhai North A/C-ah mi 120, 24-Champhai South A/C-ah mi 96 leh 25-East Tuipuiah A/C-ah PwD Voters tam berin 166 an awm a. Champhai District chhunga Assembly Constituency pangaah Vote nei Mitdel 43, Bengngawng 142, Kebai 157 leh Rilru lama harsatna nei mi 230 an awm anga chhinchhiah a ni.