Vawiin khan hnamdang Mizorama awm phalna Inner Line Permit hmang dik lo leh dan lova lo lute leh sumdawngte chungchanga hmalak dan tur sawi hovin Lungleia sawrkar thuneitute, Zirlai pawl leh Tlawmngai Pawlte bakah dan leh thupek keng kawhtu Police te an thu khawm.

He hun hi Lunglei Additional DC Pu David Liansanglura Pachuau in a kaihruai a, MZP General Headquarters in Home Minister hnena a ngenna, Mizoram chhunga hnam dang dan lova lutte dap chhuaha hrem an nih theih nana sawrkar puihna an dil, Home Deparment in District hrang hranga thuneitute beihpui thlak tura a hriattir bawhzuina tura meeting hi huaihawt a ni. Vawiin a Meeting ah hian Zirlai pawl leh YMA aiawhte pawhin hnam dang dan lova khawsa te an lo dap chhuah tawh dan leh ngawrh zawka hmalak a tul zia sawiin, Lunglei leh Hnahthial bikah ILP hman dik loh a hluar zual thu sawi lan a ni a. Meeting chuan beihpui thlaka hnam dang dan lova awm leh ILP hmang dik lote dapchuah runpui chu remchang hmasa bera neih turin an rel a ni. Meeting kaihruaitu Pu David Liansanglura Pachuau chuan he hmalakna hi fing tak leh fimkhur taka kalpui a tul thu kalkhawmte a hrilh a ni.

Lunglei Additional SP Pu Lalchhuanthanga pawhin hemi kawnga Police ten hma an lo lak tawh dan sawiin inthlahdah lovin an kalpui mek zel tih a sawi a, hnam dang dan lova lo lut man te thawn letna tur sum pawh an hmuh thu a sawi bawk a ni. Hnam dang sponsor chungchangah Dan kalha hma la duh Mizo an awm thin chu pawi a tih thu leh ram leh hnam tana tha tur kan ngaihtuah tlan a tul takzet thu a sawi bawk.