572/2025-2026

Champhai, 26th May 2025: Vawiin khan Champhai District Level Narco Coordination Center (NCORD) Committee chu Bawrhsap Pu Mohammad Aaquib kaihhruaiin DC Conference Hall, Keifangtlangah an ṭhukhawm a. Ruihhlo dona kawnga sawrkar department leh tlawmngai pawl hrang hrang te hmalakna an thlirho a ni.

Ṭhutkhawm kaihruaitu Pu Mohammad Aaquib chuan kalkhawmte lawmna thu sawiin, ruihhlo chu Mizoram khawtlang nun tichhetu leh tibuaitu a ni a, hei vang hian a do kawngah pawh theihtawp kan chhuah a ngai a ni, a ti a. Ruihhlo lo lut tur dan chah tluk zetin a la ti ve lo te hnena a hlauhawm zia hrilhhriat chu ngaihpawimawh a ṭul a ni, a ti bawk.

NCORD meeting-ah hian ruihhlo dona kawnga tha thawhtu sawrkar department hrang hrang - Police, Excise & Narcotics, Social Welfare bakah Customs, Assam Rifles leh Sub Headquarters YMA te hnen aṭangin an hmalakna leh hmachhawp te ngaihthlak a ni a. He huna tarlan danin, Champhai District Executive Force (Police) te chuan May 2025 chhung hian Heroin kg 1.112 leh Methamphetamine kg 297.714 - a vaiin cheng vaibelchhe 39.03 ( ₹39,03,94,200) man hu an man a, he mi kaihhnawihah hian mi 16 manin, case 10 ziah luh a ni.

He hun chhung vek hian Champhai Excise & Narcotics Department te chuan Heroin gram 232.41, Ganja gram 152.9, Phendyl 7, Tramadol 4 leh Alprazolam gram 12.43 an man a. He mi kaihhnawihah hian case 7 ziak lutin, mi 8 an man a ni. Assam Rifles pawhin Heroin hawng 232 an man tih an tarlang bawk.

May thla chhung hian ruihhlo ṭhat loh zia inhrilhhriatna (Awareness Campaign) chu Champhai District chhung hmun 13 ah neih a ni a. SP Pu Shivendu Bhushan chuan Champhai District chu India hmarchhak District zawng zawngah NCORD meeting leh a kaihhnawih ruahmanna kalpui ṭha bera thlan a nih thu a tarlang bawk a ni.

Champhai District NCORD ṭhutkhawmah hian Police, Health, Education, Social Welfare, Excise, I&PR, Assam Rifles, Customs, SIB leh Sub Hqrs YMA aiawhte an tel a ni.