573/2025-2026

Champhai, 26th May 2025: Vawiin khan Champhai DC Conference Hall, Keifangtlangah Bawrhsap Pu Mohammad Aaquib-a kaihhruaiin International Day Against Drug Abuse & Illicit Trafficking June ni 26 (Ningani) a hman dan tur sawiho a ni.

He hunah hian Champhai Bawrhsap Pu Mohammad Aaquib chuan Mizoram min run mek tu ruihhlo hlauhawm zia kan hriat thar theih nan International Day Against Drug Abuse & Illicit Trafficking chu huam zau thei ang bera hman ṭha ni a a hriat thu a sawi a. He ni pual hian Champhai khawpuiah mi sang khat chuang telna tur ke a kal runpui ‘walkathon’ neih te leh ruahmanna hrang hrang awm te chu sawi hawngin, kalkhawmte chu an ngaihdan thawh turin a sawm a ni.

International Day Against Drug Abuse & Illicit Trafficking hi kum 1989 aṭang khan khawvel pum huapin June ni 26 ah neih ziah ṭhin a ni a. He ni pual hian Champhai khawpuiah ke a kal runpui, ‘walkathon’ buatsaih tum a ni a. Vengsang Presbyterian Biak In kawt aṭangin Bethel Veng kawn thleng kalin, ruihhlo do leh ṭhat loh zia thuziak kengin au rual a ni dawn a ni.
He hunah hian khawpui chhung Branch YMA tin aiawh bakah Govt. Champhai College, Govt. GM High School, Govt. GM HSS leh Govt Champhai High School zirlaite tel tura beisei an ni. He kawngzawh a tel zawng zawng te tan hian T-Shirt leh lukhum sem chhuah tum a ni bawk.

He huna tel te tan hian Ruihhlo do Banner/Placard/ Slogan competition buatsaih tum a ni bawk a. YMA Branch tin te leh sikul/college te hian June ni 20, 2025 ral hmain DC Office-ah Banner/Placard/Slogan panga aia tlem lo an thehlut ang a, a ṭha zual pathum hnenah lawmman pek a ni ang.

Vawiin ṭhutkhawmah hian Champhai khawpui chhunga sawrkar department hrang hrang aiawh te, zirna in aiawh leh Sub-Headquarters YMA aiawh te an tel a ni.