Vawiin chawhma dar 10:00 khan Champhai DC Kaihhruaina hnuai-ah District NLUP Line Department hrang hrang Champhai DC Conference Hall-ah NLUP Review Meeting neih a ni.

He Meeting Champhai DC Pu Vijay Kumar Bidhuri kaihhruai-ah hian NLUP Chief Media Office Pu David Thangliana leh MJA te\'n an telpui a, he Meeting-ah hian NLUP Line department te an kal tha hle a ni. He Meeting zawh ah hian Champhai khawpui chhunga NLUP hnuai a Trade hrang hrang thlangtu Hair Cutting, tailoring, Auto Rickshaw, Carpentry, Sangha khawi, leh WRC te chu a hmun ah kalin an tlawh kual nghal a, NLUP hnuaia trade thlangtute hnathawh hi a tha thawkhat ah an ngai hlawm a ni. Champhai District ah hian NLUP thlangtu mi 5961 an ni a, Nimin khan NLUP Chief Media Officer Pu David Thangliana leh MJA te hian Zokhawthar, Melbuk leh Mualkawi a NLUP hmalakna an fangkual a, ruahman lawk dan chuan NLUP Chief Media Officer Champhai tlawhtute leh MJA te hi naktuk hian Aizawl lam panin an haw thla ang.