AH & Vety. Minister Pu Nihar Kanti Chakma chuan vawiin khan Chanmari YMA Hall-ah Mizoram Pig Producers’ Cooperative Federation (PIGFED) Ltd. General Assembly vawi 19-na a hmanpui. General Assembly hi Dr. C. Lianmawia, Chairman PIGFED Ltd. chuan kaihruaiin Rev. C Chanchinmawia’n hunserh a hmang a.

Pu Nihar Kanti Chakma chuan Sawrkar Flagship programme NLUP hnuaia vawkvulh thlang an tam em avangin AH & Vety Department chuan vawkvulh hi a ngai pawimawh in hemi atan hian ngaituahna pawh an sen hnem thu a sawi a. Minister chuan Mizoram hi sa ah kan la intodelh lo em a, vawkvulhtute nena tang hova, PIGFED in tih tak zeta tan lak a hmathlir zau tak neih tul a tih thu a sawi. Hemi atan hian AH & Vety Department chu engtik lai pawhin a in hawng reng a ni a ti.

He hunah thusawitu dang Dr L.B. Sailo, Director, AH & Vety Department chuan ranvulh a bikin vawkvulhna lamah Department in hmalakna hrang hrang an neih te a tarlang a. Chung zingah chuan Rashtriya Krishi Vigyan Yoyana (RKVJ) hnuaia National Mission on Protein Supplement kaltlanga Selesih leh District dang panga(5) ah vawk chi tha process na tur Laboratory sak nana cheng nuai 500 senna tur project atan a 1st Installment nuai 250 release a ni tawh thu te, France ram atanga vawk chi tha chawkluh te leh thingtlang lamah ran hriselna enkawlna (Rural Animal Health Centre) sak te a ni.

Registrar of Co-operative Societies aiawha thusawitu Pu Sanghlira chuan primary society te enkawl uluk a tul a, tichak leh vawn nun that chuan state level society te chu a chawm nung zawk thei a ni a ti. PIGFED Annual Report 2011-2012 chu Dr. Lalremliana Managing Director. PIGFED Ltd. in a pe a. Chawhnu lamah chuan Agenda te sawiho niin Annual Report te pawmna hun neih a ni.

PIGFED hi kum 1989 khan Cooperative Act hnuaiah Registered niin tunah hian a hnuaiah affiliated society 162 an awm mek a ni. NLUP Infrastructure Fund an dawn atangin tunhnai khan PIGFED chuan Thenzawl-ah Base Pig Breeding Farm an cheithat bakah vawk pawh engemaw zat an dah belh thu an Annual Report a hian an tarlang tel a ni.