Vawiin khan Mizoram State Law Commission Meeting vawi 14-na chu I & PR Conference Hall, Aizawl-ah an Chairman Pu R. Lalrinawma, MLA hovin an thukhawm a.

Thildang engemaw zat bakah Indian Forest Act, 1927 chu Mizoram-ah hman ve mai a tha em tia Forest Department rawtna pawh uluk taka ngaihtuah a ni a. Sawifiah tur pawhin Forest Officer Pu M.Z. Singson, WPO (S) pawh koh a ni a. Rei tak sawiho a nih hnu-ah he Draft Act hi hman ni ta se Mizoram tan a him tawk ang em tih meeting chuan a ngaihtuah a. Hman a lo nih a a ken tel tur leh mipui a nghawng theih dan tur te, Mizoram Forest Act, 1955 nena an danglamna lian deuh te nen zirho leh nise. Forest department pawhin kimchang zawkin an document te nen rawn thehlut se tiin an rel.

Hemi bakah hian a hmaa lo rel tawh Affidavit hman dik loh chungchanga mipuite zirtir/hriattirna draft chu belh ngai te belhin pawm a ni. Affidavit hmang hian Hnam leh Nihna thlak theih a ni lova, Hnam dangin Mizo Sa a phun thei lo bawk. Affidavit siam avanga engkim tih theih anga ngaih hi hriat sual vang a ni a, Affidavit hian amah ringawt in hlutna hranpa a nei lo. Khawvel kalphung leh India ram rorelna sang ber Supreme Court pawhin Tribal hmeichhia in Tribal nilo pasala a neihin an fate Tribal an nilo a lo ti tawh a. Mizoramah erawh chuan Mizo hmeichhe laka Tribal ni miah lo ten fa an neihin Mizo hmingte an pu a. A changin an pa te ngei pawhin Affidavit hmangin Mizo hming an pu a, khua a lo rei a, Ralte, Pachuau etc. an lo ni kawi duah a, hei hi Dan mit hmuha tling lo leh awmze neilo leh Dan kalh a ni. Sawrkar thuneitute pawhin Affidavit hi pawm mai loh tur tih hriat a tha hle a, Affadavit hmanga Tribal Certificate leh hamthatna dang an lo pe ve ngawt thin te hi a changtu Department tih dik loh leh mualphona mai a ni. Sawrkar hnathawkte pawhin hming an thlak duh a nih chuan sawrkar laipuiin kaihhruaina fel tak a siam sa a awm a, chu chu an zawm mai tur a ni. Affidavit hman sual avang hian mahni hming leh thiamna ni lova, sawrkar hnathawk mek engemawzat an awm tih hriat a ni a, a pawi hle. Affidavit hman diklo leh thudik tawklo hmanga Affidavit siam hi hremna dan khauh tak a awm a ni tih mipuiten hriat a tha khawp mai. Chuvangin Affidavit siam leh hman chungchangah hian tun atang chuan mitinte fimkhur lehzual a tul hle a ni. Law Commission chuan hemi chungchang ziakna hi sawrkar department hrang hranga sem turin a ruahman a, mipuite hriattur pawhin Central YMA kaltlanga puanzar ni se, tiin an rel a ni.

Vawiin meeting ah hian Member Secretary Pu Zahmingthanga Ralte, Deputy Secretary, Law & Judicial bakah Pu Saingura Sailo, Additional Secretary, Law & Judicial ; Pu T. Saikunga, President, MJSA ; Pu R.C. Thanga, Member ; Pu L.H. Lianhrima, Member ; Pu M. Zothankhuma, President, MBA leh Pu M.Z. Singson, WPO(S) Environment & Forest Department te an tel a ni.