2562/2023-2024

Champhai the 31st October 2023 - Champhai District-ah inthlan ralmuang leh felfai tak neih anih theihna tur atana Dan leh thupek kenkawh leh venhimna chungchanga hmalakna leh inpuahchahna te thlirhona meeting vawiin chawhnu khan DC Conference Hall, Keifangtlangah neih a ni a. Vote thlak ni November ni 7-a venhimna kalpui dan tur ruahmanna awmte uluk takin an thlirho a ni.

He meeting hi 25 East Tuipui AC General Observer Pu Sanjay Kumar, IAS; Champhai District Expenditure Observer Pu Abhishek J Jain; leh Champhai District Police Observer Pu Sukesh Kumar Jain, IPS te leh Champhai DC&DEO Pu James Lalrinchhana, Champhai SP Pu Vineet Kumar-te kaihhruaina hnuaia neih a ni a.

Election Observer-te chuan Election hmachhawn tura Champhai District inpuahchahna leh ruahmanna awm hrang hrangte tha an tih thu sawiin, election kaihhnawih Dan leh thupek kenkawh leh venhimna kalpui chu Election Commission of India duh dana hma la chhunzawm zel turin Champhai District official-te chu an chah a ni.

Election vuakveta Champhai District-a venhimna hna thawk turin CAPF company pali awm mekin Mizoram Police atangin Election duty tur mi 300 chuang ruat an ni bawk a. Heng Police leh CAPF te hian Champhai District hmun hrang hrangah patrolling kalpui mekin, Flying Squad leh Static Surveillance Team te nen an duty ho bawk a, Strong Room an venghim mek bawk a ni. Security kaihhnawihah Champhai District chu Zone 5-ah then niin, heng Zone te hi anmahni bial tu theuh Police Zonal Officer ten uluk takin an vil a. Engtik lai pawha a tul a che chhuak nghal thei Quick Response Team engemawzat din an nih bakah Champhai, Hnahlan, Zokhawthar, Dungtlang leh Fakrawn ah te Police Check Post (Nakas) engtiklai pawha kalpui a ni.

MLA Election, 2023 atan hian Champhai District chu Sector 12 ah then niin 23-Champhai North ah Sector pali (4), 24-Champhai South ah Sector pathum (3) leh 25-East Tuipui ah Sector panga (5) a awm a. Heng sector-ah te hian Sector Officer leh Sector Police Officer pakhat ve ve duty in, Anmahni sector chan theuhah inthlan tluang leh felfai taka kalpui anih theihnan ruahmanna mumal tak – Sector Management Plan an siam fel tawh a ni.

Champhai District Final Electoral Roll, 2023 in a tarlan danin Champhai District ah Voter mi 57,180 an awm a, an zinga mi 27,880 te hi mipa niin, hmeichhe voter 29,300 an awm a. Polling Station hi a zavaiin 84 awmin, 23-Champhai North ah 30, 24-Champhai South ah 25 leh 25-East Tuipui ah 29 a awm a ni.

Tun dinhmunah Champhai District-ah Security kaihhnawih thilah harsatna tawh ala awm lo a ni.