2561/2023-2024

2023 Khuangchawi thla ni 31: Mizoram Legislative Assembly Inthlanpui, 2023-a Mizoram chhung hmun hrang hranga election security duty tur, 1st India Reserve (IR) Battalion, Mualvum te chuan vawiin khan Kolasib-a Samagra Shiksha BRC Hall-a Facilitation Centre buatsaihah postal ballot hmangin vote an thlak.

Kolasib District Election Officer Pu John LT Sanga chuan BRC Hall-a Facilitation Centre buatsaih hi tlawhin, 1st IR Bn te'n postal ballot-a vote an thlak hi a enpui a. MLA Inthlanpui hmachhawn turin Kolasib District chu a inpeih fel tawh tih sawiin, Kolasib DEO chuan inthlan kaihhnawiha training leh hma lakna hrang hrang pawh hunbi ruahman sa angin tluang taka hlen chhuah theih zel a ni tih a sawi a. Inthlan felfai, thianghlim leh muanawm a awm theih nan inthlan buaipuitu official-te, political party, tlawmngai pawl leh mipuite'n mahni zawna tih tur leh mawhphurhnate ṭha taka hlen chhuak tura chahin, duhsakna a hlan nghal a ni.

1st IR Bn te hi district hrang hranga election duty turin naktuk khian an chhuak tawh dawn a. Hei vang hian an pualin vawiin khan postal ballot vote thlakna Facilitation Centre hi Kolasib-ah hawn a ni a. He hunah hian Kolasib District chhunga vote nei 1st IR Bn sipaite'n vote an thlak a. District danga vote neite erawh chuan a remchan danin postal ballot vote hi an la thlak dawn a ni.

Kolasib District chhunga election security duty tur police leh force dangte chuan November ni 3, 2023 khian Kolasib-ah training neiin, an training-naah hian postal ballot vote an thlak ve thung ang.