No.2788/2020-2021   

Nimin July Ni 5,2020  tlai dar 5:26pm a Khawbung RD Block huam chhunga Magnitude  4.8 a naa lirnghing avanga harsatna chi hrang hrang thlengte enfiah turin Champhai District Disaster Management team 2 te chuan vawiin khan Khawbung RD Block khaw hrang hrang an tlawh.

Team 1 na Additional DC Pu Mark Lalthanliana kaihhruai  District Disaster Management Coordinator leh JE te chuan Vaphai leh Farkawn tlangdung an fang a. Team 2 na SDO Sadar Pu Lalnunfela Chawngthu leh DLAO Pu Benjamin Zalawma Ralte te chuan Khawbung tlangdung lam an fang thung a ni. District lam thuneitute hian  mipui thlabar, mahni ina riak ngam lote tana hulhiap zarna tur leh Village Level Disaster Committee te hnenah sumfai leh silpaulin (Tuffpaulin) an pe nghal bawk a ni.

Nimin tlai dar 5:26 pm a magnitude 4.8  naa lirnghing avangin khaw 25 awmna Khawbung RD Block huam chhunga khaw hrang hrangah lirnghing hnu-hma hmuh tur a awm zela. Nimin tlai lirnghing avang khan nizanah Bialtu MLA Pu Ramthanmawia ruahmannain Khawbung BDO Quarters-ah Village Disaster Management leh MLA mi tirhte chuan Emergency Meeting an nei nghal bawk a ni.