Vawiin khan Champhai DC Pu H. Lalengmawia hovin Champhai DC Conference Hall-ah District Office hrang hrang hotuten Champhai District Results Framework Document (RFD) , 2015-2016 buatsaih leh kalpui zel dan tur an sawiho. DC chuan kumin 2015-2016 hi Mizoramah district hrang hranga RFD a vawikhatna atan siam tanna a nih thu sawiin, department tinte chu department pakhat anga inngai tlang a, thahnem ngai taka thawkho turin a sawm a ni.

RFD chungchang sawifiahna hi Pu CC Lalchuangkima, Project Director, DRDA Champhai leh Pi Lalhruaitluangi, SDC Champhai ten an nei a. RFD target siam atang hian Sorkar hnathawk tin ten hmasawn zel tum tlang turin leh, Department tinte thawh rah tlingkhawm that leh thatloh azirin District Administration chu a hmel a lang mawiin a mawilo thei a nih thu sawiin, Department mal tinte mawhphurhna leh thawhho pawimawhna an tarlang a ni.

RFD hi sawrkar laipui chuan kum 2009 – 2010 atang khan a kalpui tan tawh a. Mizoramah chuan 2013-2014 atang khan kalpui tan a ni.