UD&PA Minister Pu Zodintluanga chuan vawiin khan Pu H.Laldinmawia ziak “Literature Lamtluang” lehkhabu chu I&PR Auditorium-ah a tlangzarh.

Pu Zodintluanga chuan sorkar hi mi zawng zawng ta a ni a, infiammi an ni emaw, sumdawng mi an ni emaw, lehkhaziak mi an ni emaw tu te pawh hi sorkarin thlahthlam bik a nei dawn lo, a ti a. Tun aia nasa zawka Mizo literature phochhuah a nih theihnan tan la turin ziakmite a sawm a ni. Mizo thu leh hlate vawn that, zirchian leh thehlar a pawimawh tiin Mizo literature a tui te tana lehkhabu rawn tlak leh thangtharte tana lehkhabu rotling ni thei tur Literature Lamtluang tihchhuah a ni chu lawmawm a tih thu a sawi bawk a ni. 

Lehkhabu tlangzarh programme hi Dr.Zoramdinthara, Asst. Professor, Pachhunga University College in a kaihruai a. PUC Asst.Prof Enid H.Lalrammuani’n lehkhabu thlirlawkna hun a hmang a. PUC Principal Dr.Tawnenga chuan thu a sawi bawk.

He lehkhabu ‘Literature Lamtluang’ hi literary theory chi hrang hrang leh literary criticism chungchang chhuizauna leh zirchhianna a ni a, Mizo literature behchhanin a hrilhfiahna pawh dah a ni hlawm. He lehkhabu hi phek 425-a chhah niin Rs. 300 man a ni.