Khawvel ram hrang hrang ten kum tina an hman thin International Day for Biological Diversity chu vawiin khan hman a ni a. Mizorama a hmanna pui ber Environment & Forests Minister leh Chairman, Mizoram Biodiversity Board nibawk Pu Lalrinmawia Ralte hovin Diakkawn YMA Hall, Kolasib-ah Environment &Forests Department huaihawtin hman a ni.
Pu Lalrinmawia Ralte chuan nungcha leh sava, thing leh mau, thlai leh pangpar chitin reng mai hi mihring damkhawchhuah nan Pathianin a dah a ni tih kan pawm thiam loh chuan Mizoram hi thlaler ramah kan siam ang tih a hlauhawm a. Chuvangin hengte hi kan tih chhiat a, kan suat a, kan tih chereu chuan a tuar ber tur chu keimahni mihringte hi kan ni dawn a. Kuthlei avang leh hmelma nia rin tlat avanga nungcha kan suat thin te leh ngaihtuahna nei miah lova thing leh mau kan sat mai mai te hi kan kalsan a hun tawh a ni, a ti a. Tumna thar leh thlir dan thar nei chunga duat taka heng thil Pathianin mihring tana ro min pek hi kan enkawl chuan nakin zelah kan tu leh fate tan khawvel hi chenna tlak hmun nuamah kan siam thei dawn a ni, a ti a. Nungcha chitin reng, thing leh mau, thlai leh pangar hausakna ‘Biodiversity’ hian kan hnam zia ah hmun pawimawh tak a luah a, hengte hi a boral a, a chhiat chuan kan hnam zia hi a chhe tel vek thei a ni, a ti bawk.
Environment & Forests Minister chuan kumin chhung ngeia Conservator of Forests (Northern Circle) Pisa Aizawl a awm thin chu Kolasib ah suan thlak beisei anih thu sawiin hemi atan hian a hmunhma te chak taka buatsaih mek a ni, a ti a. He hunah hian Pangzawl khua nungcha, thing leh mau hausak dan chhinchhiahna People’s Biodiversity Register (PBR) Pangzawl, chu Minister hian a tlangzarh nghal a ni.
He programme hi Pu Rosiama Vanchhawng, IFS Additional Principal Chief Conservator of Forests, Environment & Forests Department chuan kaihruaiin Pu Liandawla, IFS, Member Secretary, Mizoram Biodiversity Board chuan thu hmaruai a sawi a. He hunah hian mithiam pathum – Dr. H.T. Lalremsanga, Assistant Professor, Mizoram Univeristy; Pu ZR Thafala, Core Faculty, SIRD, Kolasib leh Dr. Lalneihpuia Chhakchhuak, Technical Assistant, Mizoram Biodiversity Board ten thupui thlanbika an paper buatsaih te presentation hmangin kalkhawmte an hrilhfiahin an zirtir a. Pu Lalrinmawia IFS, Conservator of Forests (Wildlife) chuan lawmthu sawiin hun a khar a ni.
He Day hmanna chikhat atan Bikers rally buatsaih a ni a, Kolasib atanga Kawnpui thlengin Biodiversity Day pual hian campaign neih a ni bawk.
International Biodiversity Day hi United Nations General Assembly ruahmanna angin 1993 atanga hman tan a ni a. Kum tin thupui thlan bik neiin khawvel pumah hman thin a ni a, kumin Biodiversity Day thupui chu Hmasawnna ngelnghet atan nungcha leh thing leh mau hausakna hman tangkai “Biodiversity for Sustainable Development” tih a ni.
