Vawin May ni 22 hian Government T. Romana College leh MEF (Mizoram Educational Foundation) tangkawpten  “Quality Assurance in Higher Education “ tih thupui hmangin I&PR Conference Hall- ah National Seminar  an nei.

Khuallian Pu R. Lalrosanga Director, Higher&Technical Education Department chuan hawnna thu sawiin Higher Education dinhmun tlangpui a tarlang a. Tunah hian India ramah University 677 a awm a,  Mizoramah college 21 awmin, zirtirtu 845 an awm thu a sawi. Zirna tha nei turin zirlatite leh zirtirtute, khawvel hmasawnna leh ram changkang el pha thei tur khawp a kan inbuatsaih a tul, H&TE Director chuan a ti.

Sawm bik Prof G.C Nanda, Orissa atanga lo kal chuan key note address a pe a. Ram leh State in a mamawh ang a zirna kal pui zel a tul thute, zirna sang zawk higher education tha tak nei tura tul leh pawimawh tam tak tarlangin a taka hlenchhuah a nih theih nan NAAC leh IQAC in tangkai taka Universities leh college an vil thu te a sawi a. Zirtirtu ten hmachhawp tam tak an neih thin lehkhabu chhuah, ziah, seminar, Workshop, refresher course leh thil dang tam tak te hlen chhuah zel a tul thu a sawi bawk.

Hawnna inkhawm Dr Lalrintluanga Principal, Govt. T Romana College kaihhruaiah hian  Introductory & Welcome Speech chu Seminar Co-ordinator, Rosy Lalrinsangi’n a sawi a, Baby Lalramsiamin Assist Co-ordinator chuan lawmthu sawiin hun hnung a khar a ni.

Technical session neih chhunzawm nghal niin Session 1-na hi Prof B.B. Mishra chuan a kaihruaia a, mi pariat(8) in paper an present a. Session -2-na hi Dr. C. Lalremruata Vice President MEF chuan kaihruaiin Paper 8 bawk present leh a ni.