Parliamentary Secretary Pu TT Zothansanga chuan vawin chhun dar 12:30 khan “Consumer Puitu”, Pu Lallunghnema ziak chu Aizawl Press Club-ah a tlangzarh.

Pu Zothansanga hian “Consumer te hi kan la thangharh lova, awareness kan mamawh hle a ni” a ni tih sawiin “Kum 1986 ah Consumer Protection Act kan neih chu 1987 atanga hman tana  ni a, Mizoramah chuan hmasawnna a chak vak loh avangin tun thlengin department mala ding lovin Food and Civil Supplies department ah a bet a ni tih a sawi a, a hrana department kan neih thuai theih nan hma lak a ngai a, kan neih thuai hun hi kan hma thlir a ni” a ti.

Consumer Helpline tihchangtlun a tul bakah consumer forum leh pawl te pawh tih chak an tul hle thu a sawi a, he lehkhabu hian hma a hruai a ni tiin mithiam te kan neih tawk loh avangin District Forum president ah DC te kan ring mai zel a, DC te tui zawng a lo nih loh phei chuan a buaithlak thinin a bahlah theih thu a sawi.

Mizo ten ngaihhlut tur ngaihhlut nachang kan hre lova, a tul ber ni lo kan buaipui leh luih luih thin hi kan hmasawna daltu a nih thu sawiin Pu TT Zothansanga chuan Consumer Awareness lama harhtharna (Consumer revival) hi kan mamawh hle a, lehkhabu release chu a chung thu te hman nghal theih vek a nih thu  sawiin a tlangzarh a ni.

He lehkhabu tlangzarh inkhawm hi Dr. Rualkhuma Colney, Principal, Law College in kaihruaiin Pu Malsawmpuia Ralte, Editor Zoram Times in preview a nei a. Dr. Andrew H. Vanlaldika, Jt. Director FCS&CA chuan thu a sawi bawk a ni.