National Programme for Prevention and Control of Deafness (NPPCD) buatsaihin Vawiin May ni 22, 2015 (Zirtawpni) chawhma dar 10:15 khan Health Directorate Conference Hall, Dinthar, Aizawl-ah Lunglei District huamchhunga Health Worker te tan Bengngawnna chungchangah Training buatsaiha ni a. Dr. K.Ropari, Principal Director, H&FW-in a hmanpui.
Dr. K.Ropari chuan Health Worker te chu mahni huamchin veng leh khua hrechiang bertu an nih avang leh an thawhna Sub-Centre pawh Hospital hmasa ber ti hiala koh theih khawpa a pawimawh avangin beng chungchanga harsatna neite dapchhuah kawngah tan lakpui tura chahin," Health Worker te hi Health Department Kutke ber in ni a, Chuvangin Bengngawnna laka inven dan, enkawl dan leh mipuite hnena zirtirna thehdarh hi in kovah a innghat tlat a ni" a ti.
He Training hi Dr. Eric Zomawia, State Nodal Officer (NCD) in a kaihruai a. Dr. Lalthanmawii Khalthang, Consultant, NPPCD chuan kalkhawmte hnenah NPPCD kalphung leh hmalakna hrang hrang te tarlangin Presentation a nei a, a report atanga a lan danin khawvel tunah hian pumah bengngawng/bengchhet nasa zuala chhiar tham ringawt pawh mi maktaduai 278 awmin India ram chhungah hian maktaduai 63 zet an awma chhut a ni bawk. Mizoramah hian Beng tha lo te enkawlna Programme hi kum April ni 14, 2014 atanga kalpui tan a ni a. He Programme (NPPCD) hian a tum bul ber chu beng a chhet emaw, a ngawn lohna tura inven dan kawng dap, bengchhet rang taka hriatchhuah, a enkawl zui dan kawng zawn sak leh beng a chhet lohna tura tih tur hrang hrang mipuite hnena hrilhhriat te a ni. Dr. Lalthanmawii Khalthang pawhin thusawiin, "Health Worker te chu bial nei, in kawkip luhchhuak a, mite harsatna thlithlai thin tu an nih avangin Bengngawnna thleng thei laka khawtlang mipuite zirtirna kawngah thawkhlawk thei tak tur an ni a, chuvangin trainning pawh hi an tan buatsaih a ni" tiin a sawi.
He Training ah hian Aizawl Civil Hospital atangin ENT Surgeon pahnih Dr. Zorengpuii leh Dr. Lalhmachhuana bakah Ms. Lalrinfeli Audiologist & Speech Pathologist ten zirtirna hun an hmang a. Dr. Lalruatdiki Chawngthu State Programme Co-Ordinator in khaikhawmna hun a hmang bawk.
NPPCD Programme hnuaiah hian Health Team pathum an awm mek a. Team pakhatah hian Medical Officer, Audiologist, Audiometric Assistant leh Hearing Instructor for Hearing Impaired Children te an awm a. Tunah hian heng team te hi ENT Department, Civil Hospital, Aizawl-ah te, State Referral Hospital, Falkawnah te leh Civil Hospital, Lunglei ah te an awm a ni.
