Vawiin chawhma khan Geology & Mineral Resources (G&MR) Minister Pu H. Rohluna chuan Parliamentary Secretary Pu Joseph Lalhimpuia, bialtu MLA leh Parliamentary Secretary ni bawk Pu Hmingdailova Khiangte leh Dr H.Lallenmawia, Director, G&MR te hruaiin ONGC in oil leh gas zawnchhuah tuma hma an lak mekna Tawitaw Bungalow bul, Zanlawn chu a hmunah kalin ONGC hmalakna leh hna an thawh tawh chin te an thlirho a, tuna ONGC in hna an thawh mek chu a lungawithlak hle niin an sawi.
Pu H. Rohluna chuan ONGC hnathawkte chu chak taka thawk tura fuihin ngawrh zawka hna an thawh chuan an tum – ni 300 chhunga lei 3500 metres a thuk verh chu a hun aia hmaa an zawh thei a beisei thu a hrilh a. An hnathawhna khawl mamawh tur Vairengte Gate kaltlanga phurh luh kawngah harsatna an tawk tih ONGC in an lo hrilh chu ngaihtuah sak an ni ang a ti a. Zanlawn khawtlang mipui ten sawrkar leh ONGC te an lo tawiawm that avangin a lawmawm hle niin a sawi a. ONGC te pawhin Mizoram sawrkar in an hnathawhna kawnga a tanpui that avangin lawmawm an tih thu Minister hi an lo hrilh bawk.
Hnathawhna hmunah hian Pu Amitabha Majumder Deputy Gen Manager (Drilling) chuan an hnathawhna dan a lo kawhhmuh a. April ni 24 atang khan Leiverh tanin tunah hian 115 metres a thuk verh tawh a. Metres 3500 a thuk verh a ngai dawn a; chu chu ni 300 chhunga zawh fel an tum a ni a ti. DGM chuan lei chhung ril awm danah Zanlawn leh Meidum hi a hrang deuh a; Zanlawn ah hian leilung inthuahthip awm dan zirchianin thuah hnih (layer 2) a awm ve lo a; chumi hnuai lama leilung awmdan pawh hmun dang aiin a hrang deuh bawk a ti a. Metres 1650 a thuk an verh hunah chuan tun aia chiang zawkin an hre thei tawh ang a ti.
Minister tawiawm a kal Central YMA hnuaia Science & Environment Sub-Committee hruaitu pahnih te chuan lei verhna atanga bawlhhlawh(waste) chuan tun dinhmunah helai hmun hi a tibawlhhlawh lo nia an ngaih thu an sawi.
ONGC te hian chhun zan zawmin leiverh hna an thawk mek a. 1st IR Bn sipai ten englai pawhin an veng reng a. Zanlawn khawtlang lakah eng harsatna mah an la tawk lo niin an sawi.
