3687/2022-2023

Champhai, the 27th February, 2023: Vawiin chawhma dar 11 khan Champhai District Road Safety Committee chu an Chairman Pu James Lalrinchhana, District Bawrhsap hovin DC Conference Hall-ah an thu khawm.

District Bawrhsap Pu James Lalrinchhana chuan lirthei chetsualna thleng avanga nunna hlu tak chân a ni thin chu pawi a tih thu leh, a tam zawkte pumpelh theih a nih avangin lirthei chetvelna leh mipui veivakte him tlanna tur ngaihtuah a pawimawh thu a sawi a. Mipuite zirtir kawngah line department, khawtlang hruaitute, NGO leh Media-ten theihtawp an chhuah chhunzawm zel a pawimawh thu a sawi bawk.

He hunah hian District Road Safety Committee kalphung leh mawhphurhnate zirho a ni a. State Road Safety Policy zirchian niin, State Road Safety Council nena thawhho dan turte ngaihtuahho a ni a. Road Safety Program kaltlanga inzirtirna lam hawi hmalak theihna pawimawh hrang hrangte sawiho a ni bawk a. Champhai phaizawl New Champhai leh Zotlang inkara lirthei chetsual tamna laiah lirtheia veivakte tana himna tura hmalak a nih thu tarlan a ni bawk.

Mipui leh lirtheia veivakte him tlan nan leh lirthei chetsualna thleng avanga nunna hlu tak chan thinnate pumpelh a nih theih nan, line department leh member-te chu thla thum dan zel atana hmalakna tur ruahmanna mumal tak siam tura tih an ni a; rawtna leh ruahmanna an duante chu thutkhawm leh hmasak berah sawiho leh ni se, District Road Safety Action Plan mumal tak duan nise tih a ni a. Rui chung leh fimkhur lo taka lirthei khalh, kum tlinglo leh license nei lova lirthei khalh leh document fel lova lirthei lek chhuahte chu a him loh thu leh dan kalh a nih thu tarlan a ni a. Puipunna leh remchang apiangah inzirtirna zau zawka neih a nih theih nan hmalak nise tih a ni bawk.

PWD Champhai chu District chhunga lirthei khalhtute tana himlo, lei tla mai thei leh thawmthat ngai laite zirchianga report thehlut tura tih a ni a. Kawng kawi ulh lai leh fimkhur ngaihna lai bikah hriattirna leh inzirtirna lam hawi dah leh, lirthei khalhtute pui theitu dah tura ruahmanna neih nise an ti a. Khawpui chhunga kawng nekchepna leh tih hnawkte chu a tul anga enfiah tha tih niin, khawtlang hruaitute nen remchang hmasa berah joint inspection neih nise an ti bawk.