3688/2022-2023

Aizawl, the 27th February 2023: Tukin zingkar khan NIT Mizoram leh Government Aizawl North College(GANC) zirlai 25 leh Zirtirtute 4 te chu Ek Bharat Shreshtha Bharat North East Yuva Sangam(EBSB North East Yuva Sangam) program IIM, Rohtak, Haryana a tel turin Raj Bhavan atangin Governor Hari Babu Kambhampati chuan a vai liam.

Flag Off puala Program tawi chu Raj Bhavan Courtyard-ah buatsaih a ni a. He hunah hian Governor Hari Babu Kambhampati chuan zirlaite fuihna thu sawiin EBSB North East Yuva Sangam program chu hlawk taka hmang Turin duhsakna a hlan a ni. Prime Minister Narendra Modi remhriatna leh hmathlir tha tak avangin ram Chhunga cheng te inpumkhatna atana program tangkai em em tur EBSB North East Yuva Sangam buatsaih a ni leh chu a lawmawm tih a sawi a. He exchange program pawimawh tak hian India hmundang leh Hmarchhak bial Mipuite inhriatchianna tha zawk leh inunauna tha zawk a siam dawn a ni a ti.

Ek Bharat Shreshtha Bharat kalpui tur hian Ministry of Education chuan Ministry leh Department hrang hrang Culture, Tourism, Railways, Information & Broadcasting, Youth Affairs & Sports, Home Affairs, Department for Development of North-East Region (DoNER) leh IRCTC te a thawhpui a. He program hian India Ram hmun hrang hranga cheng te in hriat pawhna tha zawk siam a tum a, a bik Hmarchhak a cheng te nunphung leh khawsak dan te India Ram hmun danga cheng ten an lo hriat chian leh zual theih na tura buatsaih a ni bawk. He exchange program ah hian Paryatan (Tourism), Parampara (Traditions), Pragati (Development) leh Paraspar Sampark (People-to-people connect) chungchangah sawihona leh inkawhmuhna neih tum a ni.

Flag Off puala Program tawi buatsaihah hian EBSB North East Yuva Sangam chungchang leh buatsaih a nih chhan te Prof. S. Sundar, Director, NIT Mizoram in a sawi hawng a. Hemi hnu hian Governor in zirlaite fuihna thu a sawi a. Dr Lalthanchami Sailo, Registrar, NIT Mizoram in lawmthu sawiin huntawp a khar a. Program zawhah Governor chuan Zirlai leh Zirtirtu zin chhuak tur te - NIT Mizoram zirlai 18 leh Zirtirtu 2 leh GANC zirlai 7 leh Zirtirtu 2 te chu a vai liam a ni.