2486/2026-2027

Champhai dated the 1st October, 2026 : Vawiin khan Champhai District Secondary School Sports vawi 22-na kharna inkhawm chu Chhangphut Field-ah neih a ni a, Champhai Addl DC Pu Lalbiakfela, chuan khuallian niin a hmanpui.

Khuallian Pu Lalbiakfela chuan thu sawiin, infiamna leh zirna hi thalaite tan thil kal kawp tlat a nih thu leh zirlaite chu ram leh hnam hmathlir, beiseina nghahna te an nih thu a sawi a. Zirlaite chu an hmakhua ti buai thei ruihhlo leh a kaihhnawh thil laka inthiarfihlim a, infiamna hmanga intihsiakna thianghlim leh tumruhnate zir chhuaka hmakhaw eng tak nei theuh turin zirlaite a fuih bawk.

He hun hi SDEO Pu Lalthlamuana Tochhawng, chuan a kaihruai a, Organising Secretary Pu Zirmawia Ralte chuan sports hlawhtling taka neih a nih dan report a pe a ni.

District Secondary School Sports 2026-ah hian school 28 telin, Athletics, Judo, Kalchhet (Mipa), Kawibah (Hmeichhia), Volleyball leh Football (Mipa) intihsiakna neih a ni a. Mipa Best Athlete atan Gold Medal 4 latu Ramdinliana, Govt GM H/S a ni a, Hmeichhia Best Athlete atan Gold Medal 3 latu C. Lalhmangaihzuali, Govt GM H/S te thlan an ni. Govt GM H/S chuan Gold 16, Silver 7 leh Bronze 5, a vaiin medal 28 lain Overall Champion an ni a, Zokhawthar Secondary School chuan Gold 3, Silver 6 leh Bronze 2, a vaiin medal 11 lain Runner-Up an ni.