1768/2022-2023
Champhai, the 31st August, 2022: Champhai District Skill Committee chu vawiin chawhma dar 11 khan an Chairman, Pu James Lalrinchhana, District Bawrhsap hovin DC Conference Hall-ah an thukhawm.

District Skill Committee Chairman Pu James Lalrinchhana chuan Champhai District chhunga thalai thahnem takin kutthemthiamna leh thiamthil zirna dangte an hre pawh lo leh skill development training an la hmelhriat tawk lo chu veiawm tiin, skill development leh entrepreneurship-te uar thara chawilar a ngai a ni, a ti a. Mahni intodelh kawnga tanlak ngaihnate tarlangin, hmun dang atanga hnathawktu ruai lovin mahni kan intodelh thei a, hemi tur hian skill training tam zawk leh huapzo kan neih a tul a ni, a ti. District Bawrhsap chuan line department hotute chu District Skill Development Plan buatsaih chu zirchianga, hmalak ngaihnate hmanraw neih dante thlir chunga ngaihven turin a chah a. Thiamthil zir leh zir lo inkar zau lutuk ti zim tura theihtawp chhuah turin kalkhawmte a sawm a ni.

He hunah hian Pu Prannav Dutta, Mahatma Gandhi National Fellowship (MGNF), Ministry of Skill Development & Entrepreneurship chuan kum 2022-2023 atana Champhai District Skill Development Plan (DSDP) buatsaih a sawifiah a. Thlurbing zirchianna neih atanga a lan danin District chhunga thalai za zela 4 ten Skill training leh enrollment an neih laiin, za zela 96 ten an nei lo a ni.

Champhai District Skill Development Plan chu ngun taka thlirho a nih hnuah pawm a ni a. Mumal taka bawhzui a nih theih nan Sub- committees 3; Sub-committee for District Skill Development Plan, Sub-committee for Entrepreneurship and Placement leh Skill Monitoring Sub-committee-te dinfel niin member turte ruatfel nghal an ni a. Skill Development Training tam zawk buatsaih ni se tih a ni bawk a, hemi atan hian Rural Self Employment Training Institution (RSETI) leh Entrepreneurship Knowledge Cell (EKC), Govt. Champhai College kaltlanga hmalak dan ngaihtuah ni se tih a ni bawk.

District Skill Development Plan (DSDP) hnuaia hmalakna tura ruahman zingah cheng nuai 58 vel senna tur project 3; Skill Development Training for Passion Fruit Growers, Tuipui Tomato Development Project leh Skill Development Training for Sericulture Farmers tihte chu Ministry of Skill Development & Entrepreneurship hnuai Skills Acquisition and Knowledge Awareness for Livelihood Promotion (SANKALP) ah thehluh a ni a. Heng bakah hian District Skill Committee kaltlangin Entrepreneurship leh Handloom huanga hmalak a nih theih dan turte sawiho a ni bawk a. Committee chuan kutthemthiamna leh thiamthil zir kawnga Champhai District dinhmun dik tak hriat a nih theih nan leh hemi zulzuia hmalak a nih theih nan, zirchianna zau zawk leh belhchian dawl Skill Gap Survey neih ni se a ti bawk.