1767/2022-2023

Kolasib dated 31st August 2022: Vawiin chawhma khan Diakkawn YMA Hall, Kolasibah Pu K.Lalrinliana, Minister of State, Food,Civil Supplies and Consumer Affairs Department, Kolasib bialtu MLA ni bawk chuan 'Family Oriented - Socio Economic Development Programme' a hawng a. He hun hi Pu John LT Sanga, Deputy Commissioner-in kaihruaiin Pu Lalrinsanga Ralte, MLA leh Pu K.Laldawngliana, MLA-te chu khual zahawm niin an tel bawk a ni.

Minister Pu K.Lalrinliana chuan Family Oriented SEDP tih puitlin nana hmalak dan te tarlangin chhungtinin eizawnna ngelnghet an neih theih nana hmalakna piah lam ah inkalpawhna țha nei tur a kawng siam te, khaw tin a tui intur thianghlim hnianghnar awm theih nan leh eng chhit vek a nih theih nan te, ei leh bar a kan intodelh theih nana Department hrang hrang kaltlanga hmalak dan tur ruahmannate a tel thu a sawi bawk a ni. Hrileng avanga hun rei tak SEDP a tak a kalpuina tih khawtlai a nih hnu ah Sawrkar Department hrang hrang kaltlanga chhungkaw engemaw zat hnen a kalpui țan a ni tur chu lawmawm a tih thu a sawi a, 1st Installment kalpui zawh ah hian Installment dang pawh hi semchhuah zel tur a ruahman a nih thu a sawi bawk a ni. Pu K.Lalrinliana chuan chhan hrang hrang avanga nitin mamawh lakluh kawnga harsatna thleng țhin chuan mipui khawsakna ah buaina a thlen nasat thin thu a sawi a. Hei hian intodelh a țul takzet zia a lantir thu leh chumi tur chuan Family Oriented - SEDP hi țangakai tak a hmang turin hemi hnuai a hmațhatna dawngtute chu a chah a ni. Kolasib chu Mizoram luhka a nih angin district pawimawh tak a nih thu a sawi a, mipui tam zawk dawl zo tur khum 100 awm theihna District Hospital sak thuai tur a hmalak mek a nih thu te, MLA fund hmang a Dialysis Building hawn theih tur a sak zawh tawh a nih thu te leh Fast Track Court building sak hna thawh mek a nih thu a tarlang a. Hmasawnna hmel thar engemaw zah hmuh chhoh mek a nih rual hian SEDP hnuai a hmațhatna dawngtute chu hmasawnna thlentu nih tum a tihtak zet a hma laturin a fuih bawk a ni.

Pu Lalrinsanga Ralte, MLA, Serlui Assembly constituency leh Pu K.Laldawngliana, MLA, Tuirial Assembly constituency pawhin hrileng avanga ram pumin harsatna hrang hrang a hmachhawn karah chhungkaw dinhmun chawikan nana eizawnna ngelnghet nei tur a Family Oriented - SEDP a kalpui chu lawmawm an tih thu leh a tak a hlawhtlinpuitu nih tum țheuh turin kalkhawmte an chah.

Hun kaihruaitu Pu John LT Sanga, Deputy Commissioner chuan kalkhawmte lawmna thu sawiin Family Oriented - SEDP thawh khatna hian MLA Assembly constituency pakhat ah chhungkaw 1,500 zel a tuam tur thu a sawi a. Hamțhatna dawngtute chuan chhawngkaw khawsak dinhmun tihhmasawn nan hlawhtlinpui ngei tum tur a chahin, a changtu Department-ten uluk tak a an vil tur thu a sawi a. Pu R.Lalnghakliana, Project Director, chuan lawmthu sawina hun a hmang bawk a ni.

Vawiin Kolasib district-a Family Oriented - SEDP hawnna hun ah hian district chhunga Village Council tin ten he programme hlawhtling tak a an kalpui theih nan an inrelbawlna tur Fund hlan nghal an ni a. Sericulture Department, Commerce and Industries, Agriculture, Horticulture, UD&PA, Fisheries, Land Resources, Soil & Water Conservation leh Animal Husbandry & Veterinary Department kaltlanga Family Oriented SEDP hnuai a hmalak tum thlanchhuahte he hunah hian an tel a ni.