1766/2022-2023
Mamit 31st August, 2022 : Vawiin khan Chhimveng YMA Hall, Mamit-ah Mizoram Sawrkar Flagship Programme, Socio-Economic Development Policy (SEDP) Mamit District hawnna neih a ni a, Pu Lalrintluanga Sailo, Dy. Govt Chief Whip/MLA 2-Dampa chuan khuallian niin a hmanpui a. Er. H. Lalzirliana, Mamit Bialtu MLA chuan khualzahawm niin he hun hi a hmanpui bawk.

Pu Lalrintluanga chuan Mizoram Sawrkar Flagship Programme SEDP chu Mizoram chawikanna turin ruahmanna felfai taka kalpui a ni a, Kum 2019 atangin Mizoram Sawrkar budget-ah dah a ni a ti. Kan ruahmanna-a tello hripui lengin kan tum anga kalpui thei lova min siam hnuah SEDP ataka kalpui theih a ni ta chu kan zavaia lawm tur kan ni a ti a. Hripui karah pawh SEDP sum chu mipuite hriselna leh zirna lamah tangkai taka hman niin, SEDP Health Clinic Centre hmun 280-ah din a ni dawn a, hei hi thingtlang hmun kilkhawr zawk leh tlawhpawh harsa deuh zawkte tan thil tangkai tak a nih dawn thu a sawi. SEDP hlawhtling taka kalpui a nih theihna turin a dawngtu mipui, a enkawltu Line Department zawng zawngte thawhrimna a pawimawh dawn a ni a ti.

Khuallian hian SEDP chu kan trade thlan a zirin chhungkuain eizawn nana kan lo hman tawhsa tih phuisui nana kan hman theih a nih thu a sawi bawk.

Er. H. Lalzirliana, Bialtu MLA pawhin SEDP ataka kalpui a ni ta chu a lawmawm hle a, kan sum leh pai dawnte chu kan zavai atana malsawmna a nih a, kan eizawnna kawng zawhsa tihpuitlin leh tihzauh nana hmang turin kalkhawmte a chah bawk.

Pu Lalnunhlua, Chairman, District Level SEDP Committee/District Bawrhsap pawhin khua leh tui tha kan nihna angin kan pawisa dawnte a nihna tur taka kan hman a tul dawn thu sawiin, Monitoring pawh uluk taka kalpui a nih dawn thu a sawi.

He hunah hian Pu HD Lalpekmawia, Member Secretary, District Level SEDP Committee chuan report pein, Mamit District chhung MLA Constituency pathumah SEDP Beneficiaries 4500 an awm a, hengte hi Line Department Pariat (8) AH& Vety - 1119, Agriculture 807, Horticulture - 220, Commerce & Industries - 445, UD&PA - 51, Land recources L&WC - 1653, Sericulture - 37 leh Fisheries - 168, avaiin 4500 a ni. District Level SEDP Committee hmalakna hian Village Level Workshop neih a ni tawh a, SEDP tanpuina pawisa hi Line Department kaltlangin a thawhkhatna atan Rs. 25000/-in Beneficiaries-te Account-ah thun a ni dawn a ni.

Khuallian leh Khualzahawm te hian Mamit District chhung khaw hrang hrangte hnenah SEDP Beneficiaries-te enkawlna tur sum an hlan a ni.