2354/2022-2023
Champhai, the 17th October, 2022: Mizoram Skill & Entrepreneurship Award dawng tur thlan chungchang leh PÛM-2022 neih tur chungchang ngaihtuahin vawiin chawhnu dar 3 khan Champhai District Skill Committee chu an Chairman Pu James Lalrinchhana District Bawrhsap hovin DC Conference Hall-ah an thukhawm.

Mizoram Skill & Entrepreneurship Award kaltlang hian District tin atanga entrepreneurship lama thawk tha leh titha bik chawimawina dawng tur pakhat theuh thlan chhuah tur a ni a. Thukhawm chuan Champhai District atanga chawimawina dawng tur thlan tha a ti a; hemi chungchanga dilna siam dan, form fill up dan tur leh hriattur awmte zau zawka puanzar nise tih niin, dilna chu October ni 27, 2022 aia tlai lova District Skill Committee-a thehluh ni se tih a ni a. October ni 28 a endikna neiha report kimchang thehluh ni se tih a ni bawk.

Heng bakah hian November ni 9-11, 2022 chhunga Labour, Employment, Skill Development and Entrepreneurship Department hmalaknaa Innovative Fair: PUM-2022, Industrial Training Institute (ITI), ITI Veng, Aizawla neih turah District chhunga kut themthiamna lama eizawng, a tam thei ang ber an tel theih nana hmalak dan turte sawiho a ni a. He hun hi exhibition leh competition-a hman tur niin, inelnaah hian ITI-a zir mek, zir tawhte leh kut themthiam lama thiam thil nei ten an thilsiam chhuah hmangin intihsiakna an kalpui dawn a, heng bakah hian mipui vantlang hmuh theih turin thiam thil hmanga thil siamchhuah hrang hrangte pho chhuah a ni bawk ang.

PÛM-2022 Intihsiakna hi Category 2; Engineering trades leh Non Engineering trades hmangtea neih tur niin, pakhatnain Rs 1,00,000/-, pahnihnain Rs. 50,000/- leh pathumnain Rs. 30,000/- te an dawng dawn a, heng bakah People's Choice (Rs.5,000) thlan a ni bawk ang.

Intihsiaknaa tel turte tan form siam sa hmangin dilna thehluh tur a ni a, dilna form hi LESDE Department website lesde.mizoram.gov.in emaw, Directorate Office Tuikhuahtlang leh District Office-ahte Office hun chhungin ngaihven theih a ni a. Dilna hi October ni 31, 2022 aia tlai lovah Directorate of LESDE, Opp. AIR Gate, Tuikhuahtlang, Aizawl-ah thehluh hman tur a ni. Hetiang lama tui mite tan heng phone number-ahte hian zawh chian theih a ni - 8415901300/8730839707.