Vawiin chawhma dar 11:00 khan I&PR Auditorium, Champhai-ah Soil & Water Conservation Department hnuaia NLUP 3rd Phase leh 4th Phase tanpuina 3rd Installment chu Hmunphiah Trade thlangtu chhungkaw 12 tan Rs.31,780/- theuh leh Coffee Trade thlangtu chhungkaw 10 tan Rs.13,600/- theuh, a vain Rs 35,04,680/- sem a ni a, Champhai District Bawrhsap Pu Vanlalngaihsaka IAS chuan khuallian ni in he hun hi a hmanpui .

Khuallian Pu Vanlalngaihsaka Champhai DC, chuan thu sawiin NLUP chu Mizoram Sawrkarin kuthnathawktute khai chhuahna tura ruahmanna a siam a ni a, tanpuina dawngtute hian midang tan ni lo, keimahni tan, kan chhungkaw tan, kan chhungkaw hmasawnna tur, kan khua in hma a sawnna tur, Mizoram in hma a sawnna tur a ni tih hriain kan hlawhtlinpui ngei a ngai a ni, a ti a. NLUP tanpuina dawngtute zingah hmala thalo paih ngai an awm chu pawi a tih thu sawiin Sawrkarin min khai chhuak turin a thlawnin tanpuina min pe a, heti chung a titha duh lo an awm hi chu malsawmna dawngtlak an ni em aw ka ti a ni, a ti a. Hetihrual hian tanpuina dawngte zingah a titha, that chhuahpui an awm chu lawmawm a tih thu sawiin vawiina tanpuina dawngtute chu a ti hlawhtlingtu nih tum a, Sawrkarin damdawi min chawh NLUP chu tha tak leh fel tak a ti theuh turin a chah a ni.

NLUP semna inkhawm hi Champhai District Soil & Water Conservation Officer Pu Lalrinzama chuan a kaihhruai a. NLUP dawngtu te fuihna thu sawiin Midangte hlawhtlinna thlirtu leh hmutu ni mai lova hlawhtlinna neitu nih tum theuh turin NLUP Beneficiaries te chu a chah a ni. Pu Lalrinzama chuan NLUP hnuaia hmunphiah chin hlawhtlinpuitu Lamzawl khaw chanchin tarlangin chhungkaw 68 zing a NLUP hnuaia Hmunphiah chingtu chhungkaw 13 ten kum liam ta khan Hmunphiah ro Quintals 130 chuang an thar chhuak thei a ni, tih sawin Lamzawl hlawhtlinna ang neih tum theuh turin a chah bawk. Vawiin inkhawm hi Champhai Information Officer Pu Neng Thian Lal pawhin a hmanpui a ni.

Champhai District huamchhungah hian Hmunphiah Trade thlang hi chhungkaw 670 leh Coffee Trade thlang chhungkua 56 an awm a, Champhai District Soil &Water Conservation Office hian NLUP 3rd leh 4th Phase hnuaia tanpuina 3rd Installment thleng an sem zo tawh a ni. NLUP hnuaia Hmunphiah chingtute hian an hmalakna rah seng chho mekin, Sawrkar kum liam ta kum 2015-2016 khan Hmunphiah Quintals 1125.50 hralh chhuakin heta tang hian Rs.54,02,500/- lai an lei pha a, kum 2011 atanga kumin thleng hian NLUP atanga Hmunphiah phiah chin hralh chhuah zat chu Quintals 3224.85 niin heta tang hian Rs.1,54,79,280/- lai an hmu tawh a ni.