720/2023-2024

Champhai, the 8th June, 2023: Champhai District Sports Committee ruangam thar dinfel a nih hnua thutkhawm hmasa ber chu vawiin chawhma dar 11:00 khan an Chairman, Pu James Lalrinchhana, District Bawrhsap hovin DC Conference Hall-ah neih a ni.

District Sports Committee Chairman Pu James Lalrinchhana chuan Sawrkar ruahmanna anga Champhai District Sports Committee ruangam felfai tak din a nih hnua thutkhawm hmasa ber neih a ni chu lawmawm a tih thu a sawi a. Infiamna kawnga Champhai District-in result tha tak tak a nei thin chu chhuanawm a tih thu sawiin, sports chu ruihhlo dona kawnga pawimawh tak leh hriselna kawnga tih makmawk a nih thu a sawi a. Infiammite chu sports mai piah lamah hriatna leh thiamna tipung thei thilte ngaihven tel bawk turin a chah a, hei hian hmalak lehzelna turah infiammite a pui thei dawn a ni, a ti a. Champhai District chhunga sports tih hmasawn nan leh nung tha taka Association hrang hrangte an kal theih nana tanlak tlan a pawimawh thu sawiin, District Sports Committee chuan theihtawp a chhuah zel dawn thu leh District tana malsawmna a nih ngei a beisei thu a sawi bawk.

Champhai District Sports Committee Senior Vice Chairman Pu C.Hualrikhuma pawhin thu sawiin, District Sports Committee mumal leh chak tak kalpui a nih theih nana thawhhona tha tak awm chu chhawmnun zel a pawimawh thu a sawi a. Zirna leh infiamna kalkawp theih reng a nih thu sawiin, infiamna kawnga theihna sang tak nei Champhai District-ah hmasawnna a thlen zel a beisei thu a sawi bawk.

He hunah hian District Sports Committee member-te inhmelhriattirna hun hman a ni a. District Sports Committee (DSC) hnuaia hmunhma leh bungrua neih hrang hrangte felfai taka chhinchhiah niin, District Sports Complex New Champhai leh Tlangrawt Boxing Hall bakah DSYO leh Sports Association hrang hrang hnuaia hmunhma neihte tarlan a ni a; humhim leh cheihnum kawnga tulte bawhzui ran ni se an ti a. District Sports Complex leh Tlangrawt Boxing Hall-te chu District Sports Committee hmingin June ni 14, 2023 zingkarah tlawha enfiah ni se an ti a. Champhai District Cricket Association hminga dilna lut pawh ngaihtuah niin, zirchianna neih hmasak hnuah thutlukna siam ni se an ti bawk.

He hunah hian tun dinhmunah Champhai District-ah Sawrkar pawmpui Sports Association 30 an awm mek thu tarlan a ni a. Association nung tha leh hma la thate chauh pawmpui an nih theih nan leh sports promotional fund dawn thin angte pek an nih theih nana hmalak tulte ngaihtuahho a ni a. June thla chhungin District Sports Committee hnuaia Association inziaklut tur tan affiliation hun hawn ni se an ti a. Heng bakah hian tul hrang hrangte rel a ni bawk.

District Sports Committee Champhai inthlanna April ni 25, 2023 a neih bawhzuiin Mizoram Sawkar chuan Mizoram State Sports Council (Formation and Functioning of District Sports Committee) Regulations 2022 tlawhchhanin May ni 11, 2023 khan District Sports Committee Champhai ruangam hetiang hian a din a nih thu a chhuah a ni.

Chairman: Deputy Commissioner, Champhai District

Senior Vice Chairman: Pu C.Hualrikhuma, President, Champhai District Football Association

Vice Chairman: Pu R. Lalhmachhuana, President, Champhai District Body Building & Fitness Association

Secretary: District Sports & Youth Officer, Champhai District

Assistant Secretary: Pu R. Lalbiakzuala, President, Champhai District Basketball Association

Financial Secretary: Pu Lalthantluanga Tochhong, Lecturer, Govt. Gandhi Memorial Higher Secondary School

Heng bakah hian Member atan Sports Association 30 President theuhte leh Ex-Officio Member atan Line Department 9 te ruat an ni bawk a. District Sports Committee term hi notification chhuah ni atanga kum 2 chhung a ni ang.