721/2023-2024

Khawzawl, the 8th June, 2023: Samagra Shiksha, Khawzawl District leh Evangelical Teachers' Fellowship, Mizoram tangkawp bultumin vawiin chawhma dar 10:30 atang khan Zaingen YMA Hall-ah Khawzawl District huamchhunga Zirna In hrang hranga School Management Committee leh School Management & Development Committee-te tan ‘Social Transformation through Education’ tih hmangin Training buatsaih a ni a, Training-ah hian SMC leh SMDC Member 360 vel an tel thei a ni.

Vawiin training hi Pu Lalsikula, DPC, Samagra Shiksha, Khawzawl District chuan a kaihruai a. DPC chuan zirtirtute chu ram leh hnam hma hun innghahna naupangte enkawla zirtirru leh kaihruaitu an nih avangin an pawimawhzia an hriat a, ram leh hnam hmasawn chhoh zelna turah mawhphurhna an neihziate an hriat deuh deuh a tul thu a sawi a. Zirlai naupangte an enkawlna chu hna anga ngai lova, rawngbawlnaa ngai zawk turin a chah a. Training kaltlanga mithiamte thu sawi chu uluk taka ngaithla a, hlawkpui ngei tum turin zirtirtu kalkhawmte chu a chah a ni.

Training-ah hian Pu C. Chawngthantluanga, Dy. State Project Director, State Project Office, Samagra Shiksha, Mizoram, Dr Hmingthanzuala, Associate Professor (Rtd), IASE, Dr. Samuel Vanlalthlanga, Associate Professor, Aizawl West College leh Rev. Dr. Lalchungnunga, Serampore College Principal hlui te'n thupui thlan bik hmangin zirtirna an pe a. Resource Person-te thu sawi zawhah sawihona hun an hmang chhunzawm a, sawihona neih zawhah Pu Francis Lalruattluanga, CEO, Khawzawlin lawmthu sawiin hun hman tih tawp a ni.