722/2023-2024

Aizawl, 8th June, 2023 : Information & Public Relations Department leh Information & Communication Technology Department tangkawpin vawiin kha I&PR Auditorium, Treasury Square ah social media kaltlanga thuthar thehdarhtu te pualin “Media Workshop for Youtubers & Related Media” an buatsaih a, he workshop hi DIPR Minister Pu Lalruatkima’n khuallian niin a hawng a ni. He media workshop-ah hian Mizo Youtubers’ Association aiawhte leh Youtuber dangte bakah Political party hrang hranga Media Cell aiawh te, Tlawmngai pawl hrang hranga media lam buaipuitute an tel a ni.

Media Workshop hawnna inkhawmah hian Pu Lalruatkima chuan sawrkar hmalaknain print leh electronic media pual Workshop buatsaih a nih tawh thin thu sawiin, social media hmanga thuthar thehdarhtute puala media workshop erawh a vawikhatna a nih thu a sawi a, hemi kawnga ruahmanna siamtu te chungah lawmthu a sawi a ni. Pu Ruatkima chuan media pawimawhna leh media in kan nunphung a nghawng nasat dan chu mitinin kan tawng vek a, naupang inawmtleina atan pawh social media a bik takin youtube kan hmang nasa hle a, chutiang bawkin kum upa lam pawhin an hmang nasa a, smart phone nei tan chuan mahni thuthmunah kan duh hun hunah kan duh lai tak en tur a awm reng tawh hian awlsamna min siam sak a, kan uar bawk a, kan rin aiin min man bet nasa tawh hle tih a tilang chiang hle a ni a ti a. Politics leh Pathian thu bakah nitin khawaak chungchang atanga zeldin thawnthu thlengin thlir tur leh ngaihthlak tur a awm tawh avang hian kan chhungkaw nun bakah kan khawtlang nun, kan inthenawm khawvenna thlengin hlawk zawka kan chhawr dan turte vawiin workshop ah hian kan zirchhuah ngei ka beisei a ni, a ti.

Khuallian chuan social media hi mi tam takin eizawnna atan an hmang a, chutiang bawkin Mizoramah pawh social media content creator engemawzat kan nei ve tawh a, an social media channel subscribe tu tam tak an awm a, anni hian in thu leh hla te an lo ngaihchan reng thin avangin in thuchhuak ten nasa takin an rilru leh ngaihtuahna a nghawng thei tih a, chuvang tak chuan kan fimkhur lehzual a ngai em em a, kan tawngkam hman chungchangah pawh mizo tawng dik kan hman rualin tawngkam hawihhawm kan hman a tul hle a, chanchinthar thehdarh hmasatu nih a pawimawhin a chakawm thin a, chutih rual erawh chuan thubelhchiandawl leh rintlak ngaihchan phawt te hi a tul thin a, midang nun va khawihchhe vek thei thil te leh thalai rilru thianghlim tak takte a ni lo zawng a hruaikawi thei thil kan thliar hran thiam a pawimawh a, mizote hi hnam rinawm tak leh fel tak kan nih ruakinfellohna pawh kan nei ang, chutihrual erawh chuan kan fellohna leh kan thatlohna lam phochhuah ai chuan kan thatna leh kan felna, a tha la ikan phochhuah tam phawt chuan zawi zawiin mi rilru a hneh ang a, kan rilru sukthlek te pawh min thlak danglam sak vek thei dawn ani tih sawiin sawrkarin in kaihhruaina leh dan a zam te bakah Journalist te inkaihhruaina dan awm sa te hi kan zawm hram hram hian kan him bakah midangte tan pawh malsawmna thlentu kan ni zawk thin tih sawiin media workshop hlawkthlak taka hmang turin kalkhawmte duhsakna a hlana ni.

Vawiin Media Workshop-ah hian thupui hrang hrang hmangin mithiam sawm bik (resource person) mi pali in paper an buatsaih zirho a ni a. Zawhna leh chhanna hun bakah sawihona hunh man a nib awk. Resource person te leh an paper buatsaih chu a hnuaia tarlan ang hi a ni :

1. Politics boruak tha thlen tura social media pawimawhna - Prof. Malsawmliana, Secretary, MPF General Headquarters

2. Social Media hmangtute mawhphurhna - Irene Lalruatkimi, News Editor, Regional News Unit, All India Radio, Aizawl

3. Social Media thatna leh chhiatna : Mizote hmasawnna atan - Lalengzuala, Informatics Officer, ICT Department

4. Social Media kaihhnawih dan pawimawhte - Zonunsanga, MPS, Addl. SP, CID (Crime)

Vawiin Media Workshop hawnna inkhawm hi Pu C. Lalnunkima, Directyor, I&PR in a kaihruai a, Dr. Lalthlam uana, Chief Informatics Officer, ICT Department in keynote address a pe a. Nilenga hun hman niin  tlai dar 4:00 ah kharna hun hman a ni a. Pi PB Lianthangpuii, Jt. Director, I&PR in kharna hunah hian thu a sawi a ni.