Champhai District SSA Mission bultumin vawiin khan Champhai Vengsang YMA Hall-ah Champhai khawpui chhunga Primary leh Middle School zirtirtute pualin Consultation on enrolment Drive and Qualilty Education chungchang zirhona neih a ni a, he hun hi Champhai DC Pu H. Lalengmawia'n a hmanpui.
DC Pu H. Lalengmawia chuan India ramah zirna in maktaduai khat leh a chanve vel bun tawh chu mithiamten tam tawka an ngaih thu leh zirna in neih tam aia zirna tha neih atul thu an sawi chu a pawm thu sawiin, zirlaite hnenah thiamna famkim pe tur chuan (Quality) zirtirtu tha neih a pawimawh ber thu a sawi a.
Zirtirtu tha ni tur chuan zirtirna kawng tinrengah inrin tawkna neih a pawimawh thu sawiin, DC chuan zirlaiten hriatna famkim an dawn theihna turin zirlaibu piahlamah zirtirna pe chhuak thei turin hriatna neih a tul thu leh inpek zawhna a pawimawh thu te a sawi a. Zirlaiten zirlai nun an hmanna piahlamah khua leh tui tha, mi hmantlak leh nun hlawhtling nei thei tura chher chhuak turin zirtirtute ko-ah mawhphurhna a innghah thu a sawi bawk.
