Nimin chhun ah khan Governor Dr. Aziz Qureshi chuan Serlui B Hydel Project tlawh in nimin tlai ah vek khan Bangla-kawn Circuit House ah Kolasib District Officer lian te leh NGO hruaitute a kawm leh a ni.

Official leh NGO te a kawmna ah Mizoram Governor a ni thei chu mi thenkhat rin dan ang lo takin hlimawm a tih takzet thu leh Mizoram mipui hamthat nana thawk tura chona nasa tak a chungah a lo innghat ta zawk a hriat thu a sawi a. A theihna zawn ah Mizoram tan harsatna paltlang tura tha pui lo chhuah ve zel bakah Zoram mipuiin hmasawnna duhawm tak a hlawh chhuah hun te hmuh ve theih a chak a ni a ti. British hunlai khan Larsap an awm thin chu chu India sawrkar in nei chhunzawm veleh in dinhmun pawimawh takah a siam a, mipui zah pawh an kai mahse mipui nawlpui tan harsatna te va thlen theih nana hmuh harsa tak an ni thin erawh chu pawi a tih thu a sawi a. Mi tupawh, milian ber atanga a te ber thlengin tanpuina an mamawh a nih phawt chuan Mizoram Governor hi a Secretary leh office kaltlangin hmuh theih reng a ni a ti. Governor hian Kolasib District Official leh NGO hruaitute hi an District dinhmun tlangpui(district profile) zawt hmasa in mi naran(common man) tan sawrkar in hamthatna eng chin nge a pek tih te a zawt a. Education, Health, PHE, ramri chungchang bakah Bru hruaikir lehna tura District harsatna chungchang NGO leh Official te thlen pawh lo zirchian a tum thu leh a theihna zawnah hmalakpui a tum thu Governor hian a sawi a. District chhunga sawrkar hmalakna reng chu mi naran leh khawsak harsa zawk te huapzo a ni thin tur a ni a ti.

Governor leh Official te inkawmna hun hi Kolasib Addl.DC Pu Lalfela Sailo leh Pu R.P. Meena, S.P., Kolasib ten an kaihruai a.Kolasib Official te hian Kolasib District a nih hnu ah tun hi Governor in a tlawh vawikhatna a nih thu an tarlang a. Serlui a thawhna ah Serlui B Hydel Project chungchanga Mizoram Sawrkar hmalakna leh hmachhawp te hi Pu K. Duhsanga, E.E. leh a thawhpui ten an lo hrilh fiah a ni.