Nimin khan Champhai District Swachh Bharat Committee (Gramin) chu an Chairman DC Pu Vanlalngaihsaka hovin District chhunga Individual Household Latrine (IHHL) neih dan dinhmun leh hmalakna dangte thlir hovin DC Conference Hall-ah an thukhawm.

Meeting-ah hian PHE Department chu DRDA nen an thawh hona kal zelah Champhai District chhunga khawtin chu ODF (Open Defecation Free) Ekin neilo awmlohna khuaah puan vek tuma an hmalak mek chungchang sawiho a ni a. Tun dinhmunah hian Champhai District chhunga khaw 60-te chuan ekin an neih vek tawhah inpuang in, chhungkaw 218 IHHL la neilo te hi June thla ral hmaa SBM(G) emaw MGNREGA hnuaia emaw tuam tum anih thu sawi a ni a. Heng ekin la neihlohnaah te hian ODF khuaa puan vek an nih theih chuan India ram chhunga Ekin nei vek thei District pahnihnaah Champhai District chu puan theih beisei a ni.

Swachh Bharat Gramin hnuaiah hian District chhunga khaw pali ah bawlhhlawh sawngbawlna tur hmun bik (dumping ground) siam zawh tawh a ni a. Sum awm dan azirin District chhunga khawtinah bawlhhlawh sawngbawlna hi siam tum a nih thu meeting-ah hian tarlan a ni bawk.