Vawiin Chawhma dar 11 khan Champhai DC Conference Hall, Keifangtlangah, District Task Force Committee chu NULM hnuaia hmalakna peng pakhat, Self Employment Programme (SEP) hnuaia Champhai khawpuia cheng mi reithei leh mi rethei pawlte leh Self-Help Group-ten eizawnna bul an tan theih nana a pung tlem zawka loan (interest subsidy loan) pek chhuah dan tur ngaihtuahin an thukhawm a. Meeting hi Aditional DC Pu C. Lalzarliana’n a kaihruai a, District Task Force Committee member-te an tel tha hle.

Task Force Committee meeting kaihruaitu Pu C. Lalzarliana, Addl. DC, chuan mi harsa zawkten mahni kea an din theih nana ruahmanna tha tak, SEP a tumhnihna tura kalpui a ni leh tur chu lawmawm a tih thu sawiin Committee Member-te chu SEP hlawhtlin kalpui a nih theih nana ngaihtuahna seng turin a sawm a, mipuite chu mahnia eizawnna bultan turte puihna tura sawrkar laipui hmalakna chhawr tangkai tur leh sawrkar hmalakna hmang suallo turin a ngen bawk.

District Urban Development Officer Pi V. Lalmuanpuii chuan SEP loan kalphung tlangpui tarlangin Bank-te thawhpuinaah lawmthu a sawi a. Bank aiawhte hian SEP loan pekchhuah kawnga an harsatna hrang hrangte Meeting hmaah hian an sawilang bawk. SEP Loan hi thuang thuma pek tur a ni a. Individual Enterprise (SEP-I) hnuaiah hian mi kum 18 aia naupang lo, kawng hrang hranga eizawnna bul tan duhte tan Cheng nuai hnih thleng loan pek thei a ni dawn a. Group Enterprise (SEP-G) erawh chu SHG emaw mirethei pawl, mi panga chin tal, chung zinga 70% tal BPL member, hnenah loan cheng nuai sawm thleng pek theih a ni thung. A thuang thumna Bank-Linkage (SEP-BL) erawh chu SHGs ten an memberte zinga loan an pek lehchhawn tura ruahman niin an sum dahkhawl lehli thleng an puk thei dawn a ni. Bank hrang hrangte hian dahkham ngai lovin mi harsa, District Task Force Committee-in a recommend-te hnenah loan subsidy-in an pe dawn a ni.

Report-a a lan danin nikum chhung khan mimal, pawl leh SHGs 35 hnenah Loan pek a ni a, kumin target atan hian SEP loan 80 pe chhuak tura hmalak tum a ni bawk. Nikum chhung khan Bank panga, SBI, MCAB (Apex Bank), MRB, Canara leh HDFC Bank-te chu loan an pek chhuah zat tur target siam sak theuh an nih laiin HDFC bank erawh chuan SEP loan pakhat mah an pe chhuaklo a ni.

SEP Loan dilna hi July ni 20 atanga August ni 3 thleng hawn a ni ang a. Diltute hi District Task Force-in interview kovin loan pek tlaka a ngaihte chu Entrepreneurship Development Programme training pek phawt an ni dawn bawk.