Vawiin khan Champhai DC Dr. Naveen Aggarwal kaihhruainain District Task Force for Immunization (DTFI) meeting chu Bawrhsap Pisa-ah neih a ni.

Thukhawm chuan Naupang kawthalo thlentu Rotavirus venna tur Rotavirus Vaccination (RVV) kumin August thla chhunga pek tur chungchang leh inpuahchahnate a thlir a. Meeting chuan Rotavirus laka invenna RVV kalpui turin Champhai District a inpeih thawkhat tawh thu leh Mizoram huapa hawn anih ve leh a tul anga District chhunga PHC, CHC leh Health Sub Centre-ah te pekchhuah nghal anih tur thu a tarlang a. District Task Force for Immunization (DTFI) meeting chuan Champhai District-ah Vaccine 7, natna 11 vel laka invenna tur pek anih thu leh ramri kaltlanga natna kai theihte venna turin ram ri kan thinte tan  Cross Border Polio Vaccination mi 3000 chuang pek anih tawh thu a tarlang a. Vaccination la thei tur ten a hun takah Vaccine an lak vek theihna tur  leh hlawhtling taka Vaccination  kalpui anih theih nan  hemi lam buaipuitute tha taka tawiawm thin turin a chah a ni.

District chhungah  kawthalo laka invenna vaccine la thei tur naupang 2123 vel an awm a. Vaccine hi ka a thlawr tur niin naupian atanga kar 6 na, kar 10 na leh 14 naah te pek tur niin, Vaccine hian Champhai  lo thleng tawhin District Vaccine Store (DVS) ah dah that mek a ni a. District chhunga PHC/CHC te July thla chhungin an la anga August thla hian a dawng tur naupangte an pe vek hman dawn a ni. RVV kalpui tur hian District chhunga Damdawi lam thawktu hrang hrang; Doctor, Health Worker, ASHA Anganwadi Worker-te training pek an ni tawh bawk.

Rotavirus Vaccination (RVV) hi Sawrkar laipui kaltlanga Universal Immunization Programme (UIP) hnuaia hmalakna pakhat a ni a, India rama State 11 ah te kalpui tan a ni tawh a. India ramah UIP bultum  hian kum tin naupiang vaibelchhe 2.67 leh Nu naupai vaibelchhe 2.9 ten Vaccine a hun taka an lak theihna tura hmalak a ni a.  Kum tin Session Plan nuai 90 aia tam neiin, Vaccine dahthatna leh awlsam taka semdarhna tur Cold Chain Point pawh 27000 neih a ni. Rotavirus hi naupang kum 5 hnuai lam a kawthalo za zela 40 dawn lai thlentu  leh kawthalo vanga thihna za zela 14 aia tam mah thlentu niin, India ramah kum tin naupang 3,34,000 velin an thih phah thin a ni.  Kawthalo laka invenna Rotavirus Vaccine hi naupang tan a him a, Oral Polio Vaccine (OPV) 1, OPV 2 leh OPV 3 te nen a ruala pek tur a ni.