Kumin September ni 5, Zirtirtute Ni lawm dan tur chungchang relin vawiin khan State Level Working Committee chu Chairman Pu Lalchhandama Ralte, School Education Minister hovin a office chamber ah an thu khawm a. District tinah leh Sub-Division tinah rualkhai taka hman a nih theih nan leh, uar zawka zirtirtute pawimawhna intuh thar lehna ni atan hlawk taka hman a nih theih nan inbuatsaihna kalpui dan tur sawi ho a ni a.

State Level Working Committee chuan zirtirtu harsatna tawk te tanpui na tura Teachers’ Welfare Fund zirtirtu leh school naupang ten an thawh khawm thin belh chhahna tur leh mipui thinlunga Zirtirtute Ni pawimawhna tuh thar nan kumin Zirtirtute Ni pualin Car Flag zawrh an rel a. Zirtirtu damlo harsa zual te tualchhung damdawi ina inenkawlna tanpui nan Rs.7000/- leh phaia kalpui ngaite tanpui nan Rs.10000/- an inpek thin chu tualchhunga inenkawl te hnenah Rs. 10000/- leh phaia enkawl ngaite Rs.15000/- a tihpun an remti a. Nikum atanga tun July inkar ah National Foundation for Teachers’ Welfare Fund(NFTW) atang hian zirtirtu 107 te chu tanpuina pek an ni.

Pu Lalchhandama chuan hun lo kal tur ah Zirtirtute Ni hi uar zawka hman a nih theih nan a hma lama inbuatsaihna kalpui turin nakum atan chuan a hma thla thum vel atanga State Level Working Committee meeting neih tawh turin a ti a ni.