No.6836/2020-2021

Vawiin chawhma khan Champhai District Task Force for Immunization (DTFI) chu an Chairman Pi Maria C.T Zuali hovin DC Conference Hall-ah Covid-19 vaccine pek dan tur chungchang ngaihtuahin an thukhawm.

Bawrhsap Pi Maria C.T Zuali chuan frontline workers vaccine pek hmasak turte a rang lama database siama thehluh angaih thu sawiin, Covid-19 hripui dona kawnga ral hmatawnga dingte fawmkim thei ang bera database siam a tul thu a sawi a ni.

Dr.R.Lianmawia, CMO Champhai chuan Undivided Champhai district chhunga Health Care Workers 1269 te database siama thehluh  anih tawh thu sawiin, vaccine nihphungte leh dawn zat turte hriat mai theih la ni rih lo mahse vaccine dawn huna chetlak dan turte thlirin thawktute pawh training pek thuai tum a ni, a ti a. Thawktu leh hmaraw neih sa hmanga vaccine pek buaipui theih an in beisei thu sawiin, immunization schedule pangngai anga kalpui anih tur thu a tarlang  bawk.

He hunah hian Covid-19 hri danna vaccine a rawn thlen huna hmalak dan tur hrang hrangte sawiho a ni a. Tum khatah mi zawng zawng pek nghal vek  theih anih dawn loh avangin vaccine rawn thleng hmasa chu ral hmatawnga dingte pek nise tih niin, pek hmasak tur tul zual bikte ngaihtuahho a ni a. Health Care Workers mi 1269 te bakah frontline workers ngaihpawimawh zualte DC Office leh SP Office in buatsaihin CMO Office Champhaiah pe se, an niin a tul anga database mumal tak siamin thuneitu sang zawk hnenah thehlut se tih a ni.

Database siama thehluh tawh Health Care Workers 1269 zinga 1231 hi sawrkar hnuaia thawktute niin, 38 hi Private Hospital hnuaia thawktute an ni. Inpuahchahna atan tun dinhmunah CMO Champhai bialchhungah  Vaccine Facilities Centre 18  leh Vaccine Session Site 67 te ruahman a ni.