No.6835/2020-2021

Vawiin khan Sericulture Minister Dr K.Beichhua chuan Sericulture Department enkawl Silk Showroom chu mipui a duh apiang tana dawr theih turin Chaltlang, Aizawlah a hawng.

Minister Dr K.Beichhua chuan Silk Showroom hawn tak chu Zoram tana chhinchhiahtlak, mel lung pawimawh tak nia a hriat thu a sawi a. Thawmhnaw siamchhuahna la duang (natural fibres) zingah silk la chu a chungnung bik a, sik leh sa hunbi inthlak mila mihring taksa tana deuh nuam bik niin allergy leh vun natna vei ten an ngeih a, a hlutna a sang chho zel tiin Mizoram pawhin silk tharchhuah leh sumdawnna kawngah ngaihtuahna thar innovative idea kan neih chuan hmabak eng tak kan nei a ni, a ti. Engtinnge silk production-ah Mizoramin hma a sawn anga, silk pangang khawia ei zawng ten engtinnge hlawk zawka hma an lak theih ang tih te ngaihtuah a,  project an neih mek leh neih zel tur te hlawhtling taka Mizoram tana kalpui zel turin Sericulture Minister Dr K.Beichhua chuan thawktute a fuih a ni.

AH& Vety, Fisheries and Sericulture Board Vice Chairman Pu C.Lalmuanpuia, MLA  chuan silk chu englai mahin a man a tlawm ngai lo a, hralhna (market) lamah harsatna a awm lova, Mizoram sik leh sa nena inhmeh a lo nih leh zel avangin eizawnna tlak hmalakna pawimawh tak nia a hriat thu a sawi bawk.

Sericulture Director Pu Lalrozama chuan technical report pein Silk Show Room hawn tak chu kum 2017-a sak tan, North East Region Textile Promotion Scheme hnuaia Integrated Sericulture Development Project atanga sak a nih thu a sawi.

He show room-ah hian silk la atanga dehchhuah puanchei, ngotekherh, puan zeh, shawl, bag, necktie leh Mizorama sericulture farmer te thar ngei chaw tha leh hrisel - buhchium (pupa) leh cocoon atanga siam pangpar leh thildang tam tak zawrh a ni a. Mizoram Sericulture Department chuan Central Showroom-a thil zawrhchhuah te chu Silk Mark of India certified vek a ni.

Silk Showroom hawnna programme, Sericulture Directorate Office, Aizawla buatsaih hi Sericulture Secretary Pu Lalthuamluaia’n a kaihruai a. Sericulture Joint Director Pu C.Rozawna’n lawmthu sawiin hun hnung a khar a ni.