Vawiin khan Champhai District Level Vigilance & Monitoring Committee chu an Chairman Pu C.L.Ruala, MP (Lok Sabha) leh Co-Chairman Pu Ronald Sapa Tlau, MP(Rajya Sabha) hovin Champhai DC Conference Hall-ah an thukhawm. He hunah hian Champhai North bialtu MLA leh Parliamentary Secretary ni bawk Pu T.T. Zothansanga a tel a. Champhai DC leh Committee Secretary ni bawk Pu Sangdingliana chuan Committee Member zawng zawngte lawmna thu a sawi a ni.

Chairman Pu C.L. Ruala chuan Champhai District mipuite tana hmasawnna hna thawk tur chuan vawiina kalkhawmte bak chu an awm chuanglo a ni, a ti a. Sorkar laipui atanga sum lo lutte hi hmasawnna hmuh theihah chan a tul a ni, a ti. Co-Chairman Pu Ronald Sapa Tlau chuan satistics dik leh rintlak neih a pawimawh thu sawiin, RTI hmangin thildiklo a awm leh awmloh hriat a har tawhlo a, statistics lakkhawm leh buatsaih kawngah fimkhur a tul a ni, a ti a. Mahni thawh tur theuh tha taka thawh a, inlaichinna tha tak neih a pawimawh bawk a ni, tiin, kuthnathawktute tana hlawk leh tha ber tur chu ngaihtuahho zel tur a ni, a ti bawk.

Vawiin District Level Vigilance & Monitoring Committee thutkhawmah hian Sorkar laipui ruahmanna hrang hrang kalpui mek dan leh heng scheme kaltlanga hmasawnna hmuh tawh hrang hrangte sawiho a ni a. Mahatma Gandhi National Rural Employment Guarantee Act (MGNREGA) chungchang sawiin, Champhai District-ah kum 2013-2014 chhung khan Job Card Holder mi 27,919 tan ni 85 chhung inhlawhna siamsak a ni a, kumin 2014-2015 chhung hian Job card Holder mi 28,332 hnenah ni 13 chhung inhlawhna siam a nih tawh a ni.

Indira Awaas Yojana (IAY) hnuaiah nikum chhung khan in 472 sakna tur sanction niin, a vaiin sak zawh a ni a, kumin 2014-2015 atan hian in 51 sak ruahmanna awm tawh a, 1st installment sanction tawh niin, 2nd installment nghah mek a ni. Integrated Watershed Management Programme (IWMP) scheme hnuaiah hian Champhai District hi Bial 7-ah then niin, a kaihhnawih sorkar department-te bakah AMFU ten an enkawl mek a ni.

Pradhan Mantri Gram Sadak Yojana (PMGSY) hnuaia PWD, Champhai Division leh PWD Khawzawl Division kawngsiam hnathawhte, National Rural Drinking Water Programme (NRDWP) hnuaia PHED Champhai leh Khawzawl WATSAN Division-te hnathawh sawiho a ni bawk.

Rajiv Gandhi Grameen Vidhutikaran Yojana (RGGVY) hnuaiah hian December 2014 thleng khan kawlphetha luhlohna khaw 5 chhinchhiah ahte chuan kawlpetha pek vek an ni tawh a. BPL chhungkaw 5,982 hnenah power connection pek tura ruahmanna pawh tihhlawhtlin a ni tawh.

Committee kaihhruaina tharin a duan angin Sorkar laipuia Ministry of Tribal Affairs hnuaia scheme kalpui mek - Social Welfare Department hnuaia National Social Assistance Programme (NSAP)-te, District Education Office hnuaia Scholarship & Upgradation of Merit of ST Students - hmalaknate pawh thlirho a ni a. DEO Champhai hnuaiah hian kumin 2014-2015 chhungin Class IX leh X-a ST zirlaite tana Pre-Matric Scholarship pawisa release chu zirlai mipa 3,773 leh hmeichhia 4,358 hnenah pek a ni.