Vawiin khan Chhim Veng YMA Hall- Mamit ah Agriculture Department Mamit District hnuaia NLUP dawngtute tan an hnathawh leh hmalak dan zirchianna hun hman a ni a. Pi Lalbiaksangi Addl D.C NLUP Nodal Officer ni bawk chuan he hun hi a hmanpui.

Pi Lalbiaksangi chuan Mamit District hi NLUP tanpuina hmang tha ber kan nih thu sawiin hei aia tha zawka kalpui zel tur pawh a hmalak chhoh zel tum a nih thu leh tanpuina dawngtute nena inpawh tlang taka an hmalak dan te leh dinhmun inhriattawn theihna tura hetiang hun buatsaih a ni chu lawmawm a tih thu a sawi a, NLUP tanpuina pawisa hi a dawngtute Account ah dahsak thin an nih avangin Line Department te tana eiruk theih a nih loh thu a sawi bawk.

Mamit District ah hian NLUP dawngtu mi 11310 awmin heng zinga 1967 chu Agriculture Department hnuaia mi niin Rs 1400 lacs sem chhuah tawh a ni.

Vawiin Monitoring and Sensitization of NLUP Mamit District hi Pu L.V Zomuana, District Agriculture Officer, Mamit in a kaihruai a, Aizawl lam atangin Pu Lalrinliana, Jt Director Of Agriculture (CH) & Nodal Officer NLUP leh Pu Lalhmingmuana, SO-cum-SA, Directorate ten NLUP chungchanga hriattur hrang hrang te an sawi a, Zawhna leh chhanna hun hman a ni bawk.

He hunah hian Mamit District chhunga Agriculture Department hnuaia NLUP tanpuina dawngtute, District chhunga Officer awm zawng zawngte bakah Pi J.H Lalparmawii Media Officer NLUP te an tel a ni.