1442/2022-2023

Champhai, the 2nd August, 2022: Champhai District chhunga leichi lakluhte thlithlaia dan ang taka hralhchhuah a ni em tih leh, dan lova tawlh ruk a awm em tih endik tura Sawrkarin a din, Champhai District Vigilance Committee on Fertilizer chu vawiin chawhma dar 11 khan an Chairman Pu James Lalrinchhana, District Bawrhsap hovin DC Conference Hall-ah an thukhawm.

Pu James Lalrinchhana chuan loneituten leichi an duh khawp leh chanvo angte an neih ngei theih nana hmalak a tul thu sawiin, Sawrkar hmalaknaa Champhai District tana leichi quota pekte lei theih tura chhawpchhuah kawngah tanrual a tul a, intawiawm tawna infinchhuah zel angai a ni, a ti a. Loneitute hamthatna chu District Vigilance Committee on Fertilizer kutah a awm thu sawiin, an tana committee din a nih tih hriaa theihtawp chhuah tum theuh turin member tinte a sawm a ni.

Thukhawm chuan kar hmasa Zirtawpni, July ni 29, 2022 a dan lova leichi (urea) tawlhruk man, bag 500 bawr vel bawhzui kawnga hmalak dan tur a ngaihtuah hnuah leichi chu kudam remchanga hlanthlaka endik nise a ti a, vawiin chawhnu khan member-te endikna hnuaia dah luh fel nghal a ni a, remchang hmasa berah loneitute lei theih tura zawrchhuah rem tih a ni. Sawrkar dan dinglai angin bag 1 Rs. 450 zela hralh tur niin, khairual zawka sem a nih theih nan mi pakhat tan bag 2 zela hralh tum a ni. 

He hunah hian District Vigilance Committee on Fertilizer inkaihhruaina leh hmalak dan turte, dan tlawhchhan hrang hrangte zirho a ni a. Loneitute hmakhua ngaiin dan lova leichi lakluh, kawl leh tawlhruk ven kawnga tanlak a tul thu tarlan a ni a. Approved dealer nilo te, State dang leh District dang qouta leichi tawlhte chu man zel tura tih niin, District qouta te pawh hmun danga tawlhruk a nih loh nan thlithlai nise tih a ni a. Champhai District tana leichi supply tura pawmpui approved dealer mi 4 te hnenah District Committee hmingin dan leh dun leh  mawhphurhna an neihte tha taka hlenchhuak turin lehkha ziah nise tih a ni a. Leichi chahluh zat, kawl zat, pekchhuah dan kimchang leh tul dangte thla bi a report thin tur leh an dinhmunte tarlanna felfai tak signboard, hmuh mai theihin kudam-a siam tura tih nise, an report-te Committee-in zirchiangin ngaihven thin se tih a ni a. Heng bakah hian hrilh lawk lova endikna neih thin nise tih a ni bawk.

Champhai District Vigilance Committee on Fertilizer chuan leichi phurh, kawl leh zawrh chhuah chu Sawrkar pawmpui approved dealer-te tan chauha tih a nih thu leh, ruat bik nilo tena lo tih ve ngawt chu danin a khap tlat thu a chhuah a. Dan pawisa lova ti lui man chhuahte chungah dan anga hremna lekkawh theih a nih thu a tarlang bawk.

Meeting-ah hian District Vigilance Committee on Fertilizer Member Secretary Pu B.Lalhmuchhuaka, DAO; Addl. DC Pu Henry C.Lalrawnkima; Addl. SP Pu C.Lalengliana; Fertilizers Inspector & ADAO Pi Lalzarzovi; Assam Rifle Champhai OC Maj. Sunny leh member dangte an tel a ni.