1637/2022-2023
Champhai, the 17th August, 2022: Champhai District Water & Sanitation Mission (DWSM) chu vawiin chawhnu dar 1:30 khan an Chairman Pu James Lalrinchhana, District Bawrhsap hovin DC Conference Hall-ah an thukhawm. He hunah hian Swachh Bharat Mission (Gramin), ODF Plus verification protocol, Jal Shakti Kendra chungchang leh kum 2024 a thingtlang khua in tinte hnena hnianghnar taka tui thianghlim pek vek hmanna tur, Jal Jeevan Mission (JJM) hnuaia Champhai District chhunga hmalak tawhna leh hmachhawpte ngaihtuahho a ni.

DWSM Chairman Pu James Lalrinchhana chuan District hmasawn, fai leh changkang ni turin tui thianghlim hnianghnar taka neih a pawimawh thu sawiin, tuilakna siam enkawl zui mai bakah hmachhawp awmte tha taka hlenchhuah a nih theih nan tanlak a tul a, tui hian hriselna a nghawng avangin ngaipawimawh a ngai a ni, a ti a. Tui kang nghah leh tui chawiin hun leh tha a heh thu leh tui inchuh avanga ram leh ram, state leh state-te thlenga an intihbuai fo tawh thin dante tarlangin, tui thianghlim chenna in chhung ngeia awlsam taka herhhaw a nih theih nana scheme tha tak tak kaltlanga hmalak chhoh mek zel a ni chu vanneihthlak a tih thu a sawi a. DWSM member-te chu thingtlanga chengten tui thianghlim hnianghnar taka an neih theih nan an tawn hriat neihte tangkai taka hmang tura chahin, inpawhtlang taka thawhhopuiah a sawm a ni.

DWSM Executive Vice-Chairman Pu C.Lalhmachhuana, SE, PHED Champhai WATSAN Circle chuan kum 2014 atanga kalpui tan, Swachh Bharat Mission (Gramin) kaltlangin Champhai District chu kum 2016 ah pawnlera inthiar awm lohna, Open Defecation Free (ODF) District-ah puan a nih thu a sawi a. ODF vawngnung chung zelin faina kawnga hmalakna lian zawk ODF Plus ni tura tanlak a ni, a ti a. Thingtlang khua in tina tui thianghlim hnianghnar taka pek a nih theihna tur Jal Jeevan Mission (JJM) kaltlangin kum 2024 ah thingtlang khuaa in tinte tui connection pek vek hman tum a ni, a ti a. Tuilakna project tha tak tak siamte a nihna ang taka chhawr tangkai a nih theih nan tuihna siamtu ramngaw humhalh tlat a tul thu a sawi bawk.

He hunah hian DWSM Member Secretary Er. Z.D. Dengthuama, EE, PHED Champhai WATSAN Division hnen atangin meeting agenda chungchang bakah Champhai District-a SBM (G) leh JJM hmalakna leh hmachhawpte ngaihthlak a ni a. Er.Vanlalmuanawma, SDO, Champhai Project Sub-Division leh Er. C.Zothansanga, SDO, Khawbung Project Sub-Division-te hnen atangin an bial chhunga JJM hmalakna kimchang ngaihthlak a ni bawk.

ODF District nihna vawngnung reng chunga hmasawnna zau zawk, bawlhhlawh hmuh tur awm lohna, tuichhia leh bawlhhlawh sakhat sawngbawlna mumal tak neihna ODF Plus District ni tura hmalak tulte zirho a ni a. Hemi kawnga zirchianna neia hmala tura din ODF Plus Verification Team thutkhawm koh thuai ni se tih a ni a. Tuihna humhalh leh ruahtui khawl kawnga hmalakna, Jal Shakti Abhyan: Catch the Rain Campaign hnuaia Jal Shakti Kendra leh a enkawltu tur pawh ruat nghal a ni bawk.

Meeting-a tarlan a nih danin Jal Jeevan Mission hnuaia in tina tui connection pekna tur Functional Household Tap Connection (FHTC) kaltlangin in 18,373 atangin 12,207 te tui connection pek fel tawh an ni a. Hmabak 6,166 a la awm a, heng zinga a chanve aia tam mah hi tui connection peka herhhaw tawh ni mahse JMM inkaihhruaina hnuaia mi pakhat zel tan nitin tui litre 55 pek ngai zat a la tlin chiah loh avangin FHTC hnuaiah ziahluh a la ni rihlo a ni. Tun dinhmunah khua 12 ah FHTC hi zawh fel niin, khaw dang 30; Champhai Project Sub-Division hnuaia khua 10 leh Khawbung Project Sub-Division hnuaia khua 20 ahte hmalak mek a ni a. Swachh Bharat Mission (Gramin) 2022-2023 hnuaia hmalakna kalpui mek zingah PHED leh LAD 15th Finance Commission tangkawp kaltlangin Community Compost Pit 87 leh Community Soak Pit 18 te siam mek a ni bawk.