Vawiin chawhnu khan Local Administration Department, Champhai bultumin I&PR Auditorium Chanem building-ah Digital India Week hman a ni. He hun hi Pi V Lalmuanpuii, DLAO chuan kaihhruaiin, Champhai khawchhunga khawtlang hruaitute leh tlawmngai pawl hrang hrang hruaitute an tel a ni.
Hun hruaitu Pi V Lalmuanpuii chuan Digital India chu tunlai khawvel changkang zelah mipuite'n awlsawm leh zangkhai zawka kan dawr theihna tura Sorkar ruahmanna a nih thu sawiin, he programme vang hian India ram pawhin changkanna kawngah hma a sawn ve zel thu tarlangin, Champhai District-ah ngei pawh hmasawnna a thlen a beisei thu a sawi.
He hunah hian Pu Lalmalsawma, E-District Manager hnen atangin E-District chungchang sawifiahna ngaihthlak a ni a, Pu Lalmalsawma chuan E-District hi thingtlang mite leh khawpui chhung mite pawhin SOrkar Office a hmuna pan kher ngai lova, mahni awmna khua leh veng atanga kan dawr theihna tur A hmalakna a nih thu sawiin, mipui tan sum leh tha sen pawh a tlem phah sawt tur thu a tarlang a. He programme hnuaiah hian Service chi hrang hrang kalpui tur ruahman mek a ni a, mipui ten awlsam zawka Bill chi hrang hrang kan pek theihna tur te, awlsam zawka Sorkara Complain kan thehluh theih na turte leh Sorkar awlsam zawka dawr theihna tur Service chi hrang hrang 32 kalpui tum mek a nih thu a sawifiah a. Tunah hian E-District hnuaiah hian Champhai District-ah Common Service Centre (CSC) 49 zinga pasarih (7) chu khawchhunga a awm thu leh, CSC atangin DC Office kal kher ngai lovin Income Certificate, Tribal Certificate leh Residential Certifcate te a lak chhuah theih tawh thu Pu Lalmalsawma chuan sawiin, CSC te chu tangruala an mahni an hman lo a nih pawhin thiante kawhhmuna chang hre turin a duh thu a sawi bawk.
Vawiin hunah hian document dik neih pawimawhzia sawi niin, Certificate dil dawn a Document hrang hrangah mahni hming ziah dan in an vek theih nana fimkhur te, Kum tling si ID la nei lo tam lutuk leh Ration Card-a nu leh pa hming awm kawp lo tam lutuk te chu tih reh a pawimawh thu sawi a ni a. VC te chu hriatpuina lekha ah mahni veng chhung mite chauh hriatpuina ziah sak tur leh Income dik tak ziahsak turin kalkhawmte hriattir an ni bawk.
Pu Lalngaihzuala hnen atangin Digital India chhungchang sawifiahna ngaihthlak a ni bawk a. Sorkar laipui chuan Digital India a ngaih pawimawh vanga cheng vaibelchhe tel Budget atan a ruahman mek thu tarlangin, India ram chhunga khawtlang hruaitu (grassroot level) zawng zawngte'n Internet Connection an neih theihna tura ruahman a nih thu te, India rama khaw 42,300 a phone hman theih lohna la awmah phone hman theih nan ruahmanna kalpui mek a nih thu te leh mipuiten a thlawna Internet an hman theihna tur hmun siam tura hmalak a nih thu a tarlang bawk.
