Vawiin khan Aizawl District Vigilance and Monitoring Committee (V&MC) chu Lok Sabha MP Pu CL Ruala kaihhruaiin DRDA Conference Hall, New Secretariat Complex ah an thukhawm.

Pu CL Ruala chuan sorkar laipui Ministry of Rural Development atanga hmasawnna hnathawhna tur sum lokalte chu dik leh tha taka hman a nih theih nan leh mi retheite’n an chhawr tangkai theih ngei na turin viltu leh endiktu atan V&MC Committee chu din a ni, a ti a. Sawrkar laipui hmalakna in MP leh MLA Model Village chu state hrang hrangah siam tan a ni a. Hei hian a tum ber chu mipuiten neitu thinlung  pu a, an  theihtawka fai leh mawia khua theuh chu chei tur an nihzia an inhriat theih nana tih a ni, a ti. MP chuan sawrkar laipui hmalakna hrang hrang a taka chhawrtu leh neitu chu mipui an ni a, anmahni leh an tu leh fate chhawr tangkai zel tur a nih hriaa MGNREGS leh sawrkar scheme dang kaltlanga hna an thawh apiang neitu thinlung pu a thawk thin turin mipuite a fuih a, chutiang thinlung an put phawt chuan an hnathawh a tha ngei ngei ang, a ti bawk.

Meeting ah hian January-March, 2015 leh April-May, 2015 chhunga Ministry of Rural Development kaltlanga Aizawl District huamchhunga hmalakna thlir ho a ni a. PMGSY ah chuan May 2015 thleng khan kawng laih hna thawh zawh tawh 38 awmin hna kal lai 7 a awm a. Sawrkar laipui hmalakna thar Swachh Bharat Mission (Gramin) kaltlangin APL  chhungkaw 304 leh BPL chhungkaw 157 hnenah ek in (latrine) pek a ni tawh.

Indira Awas Yojana (IAY) kaltlangin  nikum chhung khan thingtlang khuaa cheng chhungkaw 70 te tan chenna in sak sak an ni a. MGNREGS ah kum kalta khan inhlawhna ni 27 siamin kuminah ni 2 siamsak an ni leh tawh. Tunah hian ni 8 inhlawhna tur pawisa hi State sawrkarin a dawng tawh bawk.

Meeting-ah hian MLA panga – Pu John Rotluangliana, Pu R.Lalrinawma, Pu KS Thanga, Pu Ngurdingliana leh Er.Lalrinawma bakah official thahnem tak an tel.