No.3163/2021-2022

Aizawl 26th November, 2021: November ni 25, 2021 (Ningani) zan khan Champhai Fire Station-a thawktute chuan Pu F. Lalchhandama, Station Officer hovin Champhai khawpui chhung hmun 4, Kahrawt Dawrkaikawn, Vengthlang, Bethel kawn leh New Champhaiah te kan hma lawka hunpui Krismas leh Kum thar lo thleng tura halpuah leh halmawi hal lo tura mipuite ngenna Street Campaign kaltlangin an nei. Aurinna kengin khawlai an fangkual a, mipuite zirtirna pein ngenna an siam nghal bawk a ni.

Street Campaign hmang hian halpuah, halmawi leh a kaihhnawih halin boruak a tihbawlhhlawh dante, mihring hriselna a tihchhiat theih bakah kangmei a tihchhuah theih dante an puang chhuak a. Halpuah, halmawi leh a kaihhnawih dangte hal lo turin mitinte an ngen a ni.

Tul lova sum sen ralna a nih bakah halpuah, halmawi leh a kaihhnawih halin damlo, thawk lama harsatna nei, tar chaklo leh lung tha lo te tan harsatna a thlen bawk avangin sorkar thuchhuahte ngaipawimawh turin mitinte an ngen a. Khua a lo thal chhoh leh tak avangin mitinte kangmei tichhuak lo tura fimkhur theuh turin an ngen nghal bawk a ni.